Një tjetër mbrëmje e mbushur me futboll evropian na pret sot, me Ligën e Evropës dhe Ligën e Konferencës që rikthehen me një program të jashtëzakonshëm.
Në total, 35 ndeshje do të zhvillohen gjatë ditës së sotme në këto dy gara, me 17 sfida në Ligën e Evropës dhe 18 të tjera në Ligën e Konferencës. Ndeshja Rennes–Olympiacos, pjesë e xhiros së katërt të Ligës së Evropës, u zhvillua të mërkurën dhe përfundoi pa gola.
Në Ligën e Evropës, vëmendja do të jetë te disa përballje mjaft interesante. Milan pret Ferencvarosin, Real Sociedad përballet me Lyonin, ndërsa Crystal Palace luan ndaj Hoffenheimit në ndeshjet që nisin nga ora 18:45.
Mbrëmja vazhdon me emra të mëdhenj të futbollit evropian. Juventusi do të luajë në udhëtim ndaj AZ Alkmaar, Bayer Leverkusen pret Marseille, Celtic përballet me Besiktasin, ndërsa Benfica kërkon pikët e radhës ndaj Lech Poznan. Në program është edhe përballja mes Sunderlandit dhe Dinamo Zagrebit.
Spektakël pritet edhe në Ligën e Konferencës, ku Atalanta do të presë Kairat Almatyn, Ajax udhëton te Midtjylland, ndërsa Trabzonspor përballet me Freiburgun.
Në sfidat e mbrëmjes veçohen Getafe–Brighton, Monaco–Nordsjaelland, Panathinaikos–CSKA Sofia dhe Copenhagen–Iberia Tbilisi.
Për tifozët shqiptarë, një nga ndeshjet më të rëndësishme të mbrëmjes zhvillohet në Rumani, ku Egnatia do të jetë mysafire e Universitatea Craiova, me fillim nga ora 21:00.
Kampionët e Shqipërisë ende nuk kanë pësuar humbje në fazën e ligës së Ligës së Konferencës. Egnatia barazoi 1-1 me Midtjyllandin në xhiron e parë dhe mori po një barazim 1-1 në udhëtim ndaj Aarhusit, duke grumbulluar dy pikë në dy takimet e para.
Përballë tyre do të jetë Craiova, e cila ka katër pikë pas dy ndeshjeve: barazoi 1-1 me Getafen dhe më pas fitoi 3-1 në udhëtim ndaj Inter Escaldes. Për Egnatian, një rezultat pozitiv në Rumani do të ishte një tjetër hap i rëndësishëm në synimin për ta vazhduar aventurën historike evropiane.
Ndeshjet e para të mbrëmjes në të dyja garat nisin nga ora 18:45, ndërsa pjesa tjetër e programit vazhdon nga ora 21:00, në një të enjte që premton shumë gola, emocione dhe përballje të forta në të gjithë Evropën./Telegrafi/
