Manchester City thuhet se po përpiqet ta mbajë Rodrin sa më gjatë që është e mundur në skuadër, duke i ofruar atij një kontratë të re, si pjesë e planit anti-Real Madrid.
Sipas Cadena SER dhe gazetarit Anton Meana, City dëshiron të vazhdojë kontratën e mesfushorit para fundit të sezonit dhe është optimist se mund ta arrijë këtë qëllim. Raportimi shton se pas fitimit të Topit të Artë, qytetarët mendojnë se janë ende në rritje dhe ky triumf individual është pjesë e këtij procesi. Por ‘hija’ e interesit të Real Madrid shqetëson kampionët në fuqi të Premierligës.
Reprezentuesi spanjoll është caktuar si objektivi kryesor i Real Madridit në vitin 2025, por me kontratën e tij deri në vitin 2027, ai nuk do të jetë i disponueshëm me çmim të ulët. 28-vjeçari, i cili aktualisht është jashtë sezonit me një dëmtim të ligamentit të kryqëzuar të përparmë, është një lojtar i rëndësishëm për skuadrën e Pep Guardiolës. Ai i ka ndihmuar ata të fitojnë një mori trofesh dhe edhe pse aktualisht është jashtë fushës – City dëshiron ta zgjasë kontratën e tij sa më shpejt të jetë e mundur.
Që kur Rodri nënshkroi për Cityn nga Atletico Madrid në vitin 2019, reprezentuesi spanjoll ka fituar katër tituj të Premierligës, një Kupë FA, dy Kupa Carabao, një Ligë të Kampionëve, një Superkupë UEFA dhe një Kupë të Botës për Klube FIFA. Ai gjithashtu ka shënuar 26 gola dhe ka bërë 30 asistime në 260 paraqitje.
Ndërsa ish-lojtari i Villarrealit, Rodri vazhdon rehabilitimin e tij, skuadra e tij City udhëton drejt Bournemouth të shtunën, duke kërkuar të zgjerojë epërsinë e tyre në krye të Premierligës.
