Fluks i madh i automjeteve është regjistruar sot në pikën e pagesës në Kalimash, në autostradën Rruga e Kombit, duke shkaktuar bllokim të përkohshëm të procesit të pagesave dhe krijimin e kolonave të gjata.
Sipas burimeve nga Scanner, qytetarët që po kthehen nga Shqipëria drejt Kosovës po përballen me pritje të gjata, për shkak të vonesave në sistemin e pagesës në këtë segment rrugor.
Disa drejtues mjetesh kanë raportuar se radha e automjeteve shtrihet për disa kilometra, ndërsa lëvizja po zhvillohet me ritëm shumë të ngadaltë. Ende nuk dihet saktësisht shkaku i ndërprerjes së pagesave, por dyshohet për probleme teknike apo mbingarkesë të sistemit për shkak të fluksit të shtuar.
Autoritetet nuk kanë dalë ende me një njoftim zyrtar lidhur me situatën.
