- Advertisement -
Kryeministri i Republikës së Kosovës, Albin Kurti, së bashku me ministrin e Bujqësisë, Pylltarisë dhe Zhvillimit Rural, Faton Peci dhe deputetët e Kuvendit, Arbër Rexhaj, Artan Abrashi dhe Arjeta Rexhepi, bënë homazhe dhe vendosën lule te freskëta në kujtim të dëshmorit Vetim Shala, në përvjetorin e 36-të të rënies së tij.
Kryeministri kujtoi se në vitin 1989, kur u suprimua autonomia e Kosovës, shpërthyen demonstratat gjithandej Kosovës, e sidomos në Prishtinë, me ç’rast u vranë edhe të rinjtë tanë, studentë, në mesin e të cilëve edhe dëshmori Vetim Shala, i cili atë kohë ishte student i Fakultetit të Mjekësisë të Universitetit të Prishtinës.
Duke përkujtuar dëshmorët, kryeministri tha se ia kujtojnë vetes sonë edhe çmimin e lirisë, edhe idealin e dëshmorëve, por gjithashtu edhe rrugën që duhet të ndjekim për forcimin e shtetit, zhvillimin e ekonomisë, ngritjen e reputacionit të vendit dhe mirëqenien e qytetarëve. Ai shtoi se asnjë brez i veprimtarëve nuk duhet t’i harrojë brezat e tjerë të veprimtarëve dhe të gjithë dëshmorët janë bashkë.
Kosova sot është më e sigurt, më demokratike dhe më e mbrojtur e avancuar se kurrë më parë, prandaj, edhe nën dritën e amanetit të dëshmorëve, nuk na humbet asnjëherë as vullneti e as drita për udhën përpara për të mirën e brezit tonë, e të brezave që do të vijnë, u shpreh kryeministri në Prizren.
Pas homazheve kryeministri Kurti vizitoi prindërit e dëshmorit Vetim Shala, Ramadan dhe Nurije Shala.
Deklarimi i plotë i kryeministrit Kurti:
Të nderuar të pranishëm,
Jemi mbledhur bashkë sot këtu me rastin e 36-vjetorit të rënies heroike të dëshmorit të kombit, Vetim Shala.
Para demonstratave të viteve 1997-1998, kanë qenë demonstratat e viteve 1988, ’89 dhe ’90, e para atyre kanë qenë demonstratat e vitit 1981, e para atyre kanë qenë demonstratat e vitit 1968. Kështu, brezat e shqiptarëve janë lidhë nëpër demonstrata e rezistencë dhe e gjithë kjo është histori e kryengritjes së armatosur e luftës çlirimtare të prirë nga UÇK-ja në vitet 1998-1999.
Para 36 vjetëve ishte koha kur u suprimua autonomia e Kosovës, e cila u quajt “Ndryshime Kushtetuese” të votuara asokohe në Kuvendin Krahinor me 23 mars të vitit 1989 dhe shpërthyen demonstratat gjithandej Kosovës, e sidomos në Prishtinë, me ç’rast u vranë edhe të rinjtë tanë, studentët, Ismeti, Shukria, Mustafa, Sevdaili dhe Vetim Shala, student i Fakultetit të Mjekësisë të Universitetit të Prishtinës. Pra, me gjakun e të rejave dhe të rinjve tanë, u vendosën themelet e Republikës, e cila e ka Deklaratën Kushtetuese me 2 korrik 1990, çlirimin e Kosovës me 12 qershor 1999, dhe më pastaj shpalljen e pavarësisë më 17 shkurt 2008.
Asnjë brez i veprimtarëve nuk duhet t’i harrojë brezat e tjerë të veprimtareve dhe të gjithë dëshmorët janë bashkë. Ne, duke i përkujtuar ata, ia kujtojmë vetes sonë edhe çmimin e lirisë edhe idealin e dëshmorëve, por njëkohësisht edhe rrugën që duhet të ndjekim për forcimin e shtetit, zhvillimin e ekonomisë, ngritjen e reputacionit të vendit tonë dhe mirëqenien për të gjithë qytetarët pa dallim.
Kosova sot është më e sigurt, më demokratike dhe më e mbrojtur e avancuar se kurrë më parë. Prandaj, edhe nën dritën e amanetit të dëshmorëve, nuk na humbet asnjëherë as vullneti e as drita për udhën përpara për të mirën e brezit tonë, e të brezave që do të vijnë.
Lavdi Vetim Shalës dhe gjithë dëshmorëve e martirëve të kombit shqiptar!
