Një situatë e tillë e përsëritur pos që do të përshkallëzonte sigurinë në shtetin e Kosovës, do të sillte edhe një situatë të re në përballje me ndërkombëtarët.
Të paktën kështu la të nënkuptohet ndihmëssekretari amerikan i Shtetit për Çështje Evropiane dhe Euroaziatike, James O’Brien, i cili tha se shkaktimi i trazirave në veri të Kosovës nënkupton përballje me NATO-n.
E, sipas profesorit Milazim Krasniqi kjo është një ndër deklaratat më të fuqishme nga Departamenti Amerikan i Shtetit. Andaj, Krasniqi bën thirrje që ajo të merret shumë seriozisht nga Qeveria e Kosovës.
“Në mënyrë absolute mendoj që kjo i adresohet Serbisë, përkatësisht edhe Rusisë si sponsor të terrorizmit që realizohet me Radojiqin dhe banditët e tillë por natyrisht duhet ta marrim si relaksim sepse thjeshtë është qëndrim për të shmangur konfliktet, por në anën tjetër Qeveria duhet ta marrë me përgjegjësi shumë të madhe”, ka thënë profesori, Milazim Krasniqi.
Ndërsa njohësi i çështjeve të sigurisë, Valdet Hoxha, këtë mesazh e sheh në dy kënde.
“Tregon seriozitetin e situatës dhe potencialin shpërthyes që ka veriu i vendit dhe e dyta tregon seriozitetin se çfarë po i qasen Shtetet e Bashkuara këtij problemi, pra duhet të jemi në koordinim të vazhdueshëm me SHBA-të dhe me KFOR-in sepse ka mundësi reale dhe potencial të madh për shpërthim”, ka thënë njohësi i sigurisë, Valdet Hoxha.
Ndër të tjera, O’Brien tregoi se sekretari amerikan i Shtetit, Antony Blinken, do të bisedojë për rritjen e tensioneve në Ballkanin Perëndimor gjatë takimit dyditor të ministrave të Punëve të Jashtme të shteteve të NATO-s, më 28 dhe 29 nëntor, në selinë e aleancës në Bruksel.
