Nënkryetari i Partisë Socialdemokrate, Qëndron Kastrati, ka shprehur shqetësimin e tij në lidhje me krijimin e Asociacionit, duke e quajtur atë një “makinë” që do të prodhojë probleme të vazhdueshme mes shqiptarëve dhe serbëve.
Kastrati ka theksuar rëndësinë e mbajtjes në mend të historisë dhe trajtimit të keq të shqiptarëve në të kaluarën nga serbët, si dhe nevojën për të parandaluar hakmarrjen grupore në kohën e sotme.
“Ne e kemi bindjen që Asociacioni ka me qenë një makine e cila vazhdimisht do të krijojë probleme mes shqiptarëve dhe serbëve. Na duhet me rikujtu që historinë qysh e kemi, trajtimin që e kanë përjetuar shqiptarët më herët edhe shqiptarët tash që e kanë nevojë për një hakmarrje në grupe të caktuar”, ka deklaruar ai në Debat Plus.
Po ashtu, ai ka shprehur shqetësimin e tij në lidhje me themelimin e Asociacionit dhe ka vënë në dukje rreziqet e mundshme të ndarjes të njerëzve sipas kombësisë, që mund të sjellë pasojat negative në shoqërinë kosovare.
Ai ka bërë krahasime me modele të Bashkimit Evropian, duke vënë në dukje se Serbia nuk është një vend i njëjtë me Austrinë ose vende të tjera të Bashkimit Evropian.
Kastrati gjithashtu ka theksuar sjelljen e Serbisë në vende të tjera në rajon, si Bosnja dhe Mali i Zi, duke thënë se kjo shërben si një tregues se duhet të kemi kujdes në trajtimin e çështjeve të komunitetit serb në Kosovë.
“Themelimi i Asociacionit, domethënë ndërtimi i një funksionimi ku njerëzit kanë me jetuar të ndarë mbi kombësitë që i kanë në mënyrë të vazhdueshme ka me sjellë probleme. Është vërtetë që modelet e Bashkimit Evropian kanë funksionuar mirë. Por nuk duhet të harrojmë që Serbia nuk është Austria, edhe vendeve tjera. Ne e shohim sjelljen e Serbisë në Bosnje, në Mal të Zi, edhe në vende të ndryshme ku e ka pakicë komunitetin serb”, ka thënë ai.
Nënkryetari i PSD-së, ka shprehur bindjen e tij se themelimi i Asociacionit do të pengojë zhvillimin shoqëror dhe qytetarë të Kosovës.
