Juventusi ka zyrtarizuar transferimin e Kerim Alajbegović, duke sjellë në Torino një nga talentët më të kërkuar të futbollit evropian nga Bayer Leverkusen.
Sipas njoftimit zyrtar të klubit, mesfushori ofensiv 18-vjeçar ka nënshkruar kontratë afatgjatë deri në vitin 2031.
Asnjëra palë nuk e ka bërë publike shumën e transferimit, por raportimet në Gjermani dhe Itali bëjnë të ditur se Juventusi do të paguajë mbi 30 milionë euro, ndërsa me bonuset vlera totale e marrëveshjes mund të arrijë deri në 40 milionë euro.
“Bianconerët” fituan garën për shërbimet e talentit të ri, duke lënë pas konkurrencën e fortë nga Chelsea, Napoli dhe Atalanta.
Chelsea thuhet se ishte klubi që insistoi më së shumti për transferimin e Alajbegović. Madje, ish-trajneri i Bayer Leverkusenit, Xabi Alonso, raportohet se i bëri një ofertë personale lojtarit. Megjithatë, pamundësia e klubit anglez për t’i garantuar minuta të rregullta në ekipin e parë, sidomos pas transferimit të Morgan Rogers, ndikoi negativisht në negociata. Sipas raportimeve, faktori vendimtar ishte garancia që Juventusi i dha për një rol në ekipin e parë.
I lindur në Gjermani dhe përfaqësues i Bosnje dhe Hercegovinës, Alajbegović është produkt i akademisë së Bayer Leverkusenit. Verën e kaluar ai u transferua te RB Salzburg, por zhvillimi i tij i shpejtë bëri që Bayer të aktivizonte klauzolën e riblerjes dhe ta rikthente këtë verë.
Megjithatë, vetëm pak javë pas rikthimit, Juventusi arriti ta transferojë talentin 18-vjeçar.
Alajbegović largohet nga Bayer Leverkusen pa zhvilluar asnjë ndeshje zyrtare me ekipin e parë, duke i dhënë fund një lëvizjeje mjaft të veçantë në karrierën e tij të hershme.
