Kryetari i AAK-së, Ramush Haradinaj, ka kujtuar në 26-vjetorin e rënies heroin Agim Ramadani që i dha vulë Betejës së Koshares, së bashku me Sali Çekajn e Xhemajl Fetahajn, duke e bërë atë unike dhe të pavdekshme.
Në një postim në Facebook, ai ka pohuar se në përvjetorin e përjetësisë kujton dhe nderon trimërinë e pashembullt të tij, si strateg dhe ndërtues i unitetit çlirimtar. Ai ndoqi deri në frymën e fundit betimin e tij për të mos vdekur pa luftuar!
“I pari ushtar shqiptar që shkuli gurin e kufirit që ndante shqiptarët, ra heroikisht te Rrasa e Zogut, për të mbetur i gjallë në kujtesën e popullit dhe të shtetit të Kosovës. Kujtojmë sot trimat e UÇK-së që, krahas komandant Katanës, do të kujtohen përherë si heronjtë e thyerjes së kufirit mes shqiptarëve: Abush Loku, Bashkim Jasiqi, Ramiz Krasniqi, Rifat Çelaj, Arben Jusufi, Driton Veliu, Emri Curri, Harun Beka, Rifat Salihaj, Rrahman Tafa dhe Sylejman Shala”, ka thënë Haradinaj.
