Arsenali u afrua një hap më afër fitimit të titullit të parë të Premierligës pas 22 vitesh, duke mposhtur Burnleyn tashmë të rënë nga kategoria me rezultatin 1-0 dhe duke ia kaluar presionin Manchester Cityt për ndeshjen e tyre të parafundit të së martës.
Duke ditur se mund të bënin një hap të madh drejt historisë, Arsenali tregoi durim në ndërtimin e lojës për golin e avantazhit.
Rasti i parë i pastër erdhi kur Leandro Trossardi krijoi hapësirë dhe goditi fuqishëm në shtyllën e parë nga jashtë zone, ndërsa Eberechi Eze regjistroi gjuajtjen e parë në portë me një volej nga distanca.
Mikel Arteta reagoi me zemërim kur Bukayo Saka nuk fitoi penallti pas një përplasjeje me Lucas Pires, ndërsa goditja e Martin Ødegaardit nga brenda zonës u devijua paksa jashtë.
Goli erdhi nga një situatë standarde – dhe ishte goli i 18-të sezonal i Arsenalit nga goditjet nga këndi, një rekord i ri.
Kai Havertz u ngrit mbi të gjithë në zonë dhe shënoi me kokë, duke i dhënë edhe asistimin e 50-të në Premierligë Bukayo Sakas.
Arsenali vazhdoi të kërkojë golin e dytë në pjesën e dytë, me Eze që goditi traversën pas një devijimi të lehtë nga portieri Max Weiß.
Havertz gjithashtu iu afrua kartonit të kuq për një ndërhyrje ndaj Lesley Ugochukwu, por u shpëtoi ndëshkimit.
Pavarësisht presionit në fund, skuadra e Artetës u mjaftua me fitoren minimale, duke marrë tre pikë shumë të rëndësishme.
Fitorja e tretë radhazi 1-0 do të thotë se çdo gabim i Manchester Cityt ndaj Bournemouthit të martën mund t’i japë Arsenalit titullin edhe para ndeshjes së fundit kundër Crystal Palacet, duke u dhënë atyre më shumë kohë për përgatitjet për finalen e Ligës së Kampionëve.
Ndërkohë, Burnley duhet të fitojë ndaj Wolvesit javën e ardhshme për të shmangur rekordin negativ të klubit për numrin më të ulët të fitoreve në një sezon të Premierligës.
Arsenali tashmë ka 82 pikë të tubuara pas 37 ndeshjesh, pesë më shumë se City që ka 77 pikë, por me një ndeshje më pak.
