Ish-lojtari i Liverpoolit i kthyer në analist, Jamie Carragher, ka thënë që Casemiros nuk i ka mbetur më energji për të luajtur në nivelin më të lartë.
“Mendoj që Casemiroja, dhe e kam krejt seriozisht, duhet ta dijë që nga sonte se si lojtar me përvojë, i ka vetëm tri ndeshje në nivel të lartë, dy ndeshjet në ligë dhe finalen e kupës, dhe të mendojë: Duhet të shkoj në MLS ose në Arabinë Saudite”, ka thënë Carragheri.
“E kam shumë seriozisht. Agjenti i tij, njerëzit rreth tij, duhet t’i kallëzojnë që duhet të ndalet”.
“Ne po e shohim njërin prej më të mirëve të kohëve modern, i cili ka luajtur në njërën prej mesfushave më të mira të të gjitha kohërave – kur i mbante Toni Kroosin dhe Luka Modriqin në të dyja anët – i cili lehtë i dilte ballë mesfushës së Barcelonës të cilën të gjithë e njihnim dhe e donim”.
“As që i afrohem nivelit të cilin e ka arritur ky njeri, por gjithmonë më kujtohet diçka nga koha kur u pata pensionuar”.
“Ishte një thënie që gjithmonë më bie ndërmend si futbollist: Lëre futbollin, para se futbolli të të lë ty!”
