Real Madridi dhe presidenti i klubit, Florentino Pérez, vazhdojnë ta kenë si ëndërr transferimin e Michael Olise, ndërsa paraqitjet e tij në Kupën e Botës 2026, përkrah Kylian Mbappés, vetëm sa kanë forcuar bindjen se madrilenët nuk duhet ta humbasin këtë mundësi.
Nga ana tjetër, vetë futbollisti raportohet se është i fiksuar pas idesë për të luajtur me fanellën e Real Madridit dhe është i gatshëm të bëjë gjithçka që transferimi të realizohet.
Madje, sipas raportimeve, ai ua ka shprehur këtë dëshirë edhe disa bashkëlojtarëve të tij te kombëtarja e Francës.
Ndërsa Real Madridi po punon me kujdes për të krijuar kushtet e duhura për një marrëveshje, Bayern Munich vazhdon të mbajë një qëndrim të prerë, duke insistuar se Olise nuk është në shitje.
Sipas “AS”, klubi bavarez dha një sinjal të qartë edhe përmes prezantimit të fanellës së dytë për sezonin e ri.
Të hënën, Bayerni publikoi videon zyrtare të fanellës mysafire, ku Michael Olise ishte protagonisti kryesor i reklamës.
Gjatë videos, francezi shfaqet disa herë me fanellën e re, në një mesazh që shumë e interpretuan si një deklaratë të heshtur të klubit se ai do të mbetet pjesë e Bayernit.
Real Madridi dhe Bayern Munich kanë ruajtur marrëdhënie shumë të mira ndër vite dhe nuk dëshirojnë t’i dëmtojnë ato për shkak të këtij transferimi.
Për këtë arsye, sipas raportimeve, dy klubet kanë arritur një mirëkuptim jozyrtar që çdo zhvillim rreth Olises të trajtohet me transparencë të plotë, pa negociata të fshehta apo lëvizje të papërshtatshme.
Real Madridi respekton faktin që Olise ka kontratë me Bayernin dhe është i vetëdijshëm se klubi gjerman rrallëherë shet yjet e tij.
Për këtë arsye, madrilenët nuk do të bëjnë asnjë lëvizje konkrete nëse vetë Olise nuk i komunikon drejtuesve të Bayern Munichut se dëshiron të largohet.
Nëse transferimi realizohet, ekziston mundësia që ai të thyejë rekordin historik të futbollit për shumën e transferimit, duke marrë parasysh kërkesat e larta financiare të Bayern Munichut dhe vlerësimin e madh që i bëhet futbollistit francez.
