Bayern Munich siguroi titullin në elitën e futbollit gjerman për të 35-ën herë në histori, pasi përmbysi rezultatin për të fituar 4-2 në shtëpi ndaj Stuttgartit, që renditet në vendin e katërt në Bundesliga.
15 minutat e para ishin të balancuara, me raste të shpërdoruara nga Kim Min-jae dhe Bilal El Khannouss.
Megjithatë, në minutën e 21-të, El Khannouss asistoi për Chris Führich, i cili shënoi nga një kënd i vështirë për t’i dhënë epërsinë Stuttgartit.
Ky gol rrezikoi festën e Bayernit, por kampionët reaguan fuqishëm me tre gola brenda gjashtë minutash.
Jamal Musiala depërtoi bukur dhe asistoi për Raphaël Guerreiron, i cili barazoi nga afërsia.
Më pas, një gabim i Stuttgartit në mesfushë lejoi Luis Díazin të asistojë për Nicolas Jacksonin për golin e dytë.
Pak më vonë, Alphonso Davies realizoi me një goditje të devijuar për 3-1, duke e mbyllur praktikisht ndeshjen dhe duke vulosur titullin para pushimit.
Në pjesën e dytë, trajneri Vincent Kompany aktivizoi Harry Kanen dhe Michael Olisen, dhe Kane shënoi vetëm shtatë minuta pas rifillimit për golin e katërt dhe të 32-tin personal në kampionat këtë sezon.
Alexander Nübel ndali një tjetër gol të mundshëm nga Leon Goretzka, ndërsa në fund Chema Andrés shënoi një gol nderi për Stuttgartin me një goditje të bukur që mposhti Jonas Urbig.
Titulli tashmë ishte i sigurt për Bayernin, i cili tani fokusohet te DFB-Pokal dhe Liga e Kampionëve, duke synuar një sezon me tre trofe.
Ndërkohë, Stuttgarti mban ende një epërsi prej dy pikësh ndaj Hoffenheimit në garën për kualifikim në Ligën e Kampionëve, pavarësisht se ka humbur katër nga shtatë ndeshjet e fundit në të gjitha garat.
Momentalisht, katër xhiro nga fundi, Bayerni ka 79 pikë, derisa vendi i dytë, Dortmundi ka 64 pikë.
Ndërkohë, Stuttgarti i ka 56 pikë në vendin e katërt.
