Barcelona është e gatshme të dëgjojë ofertat që mund të vijnë gjatë afatit kalimtar të verës për mbrojtësin francez Jules Kounde.
Kounde ka qenë një nga lojtarët kyç të Barcelonës në sezonet e fundit dhe një element i rëndësishëm në prapavijë, megjithatë sipas raportimeve nga mediat spanjolle, ai nuk konsiderohet më i paprekshëm nga drejtuesit e klubit.
Klubi katalunas vazhdon të përballet me sfida të mëdha financiare, dhe një shitje e rëndësishme e një prej lojtarëve me vlerë të lartë në treg shihet si mundësi për të krijuar hapësirë ekonomike dhe për të forcuar skuadrën në pozita të tjera gjatë verës.
Mbrojtësi francez ka qenë edhe më herët në radarët e klubeve elitare evropiane, ku interes të madh kishte shfaqur sidomos Manchester City.
Në atë periudhë, Barcelona reagoi duke e rinovuar kontratën e tij dhe duke përmirësuar kushtet financiare për ta mbajtur në “Camp Nou”.
Edhe pse Kounde mbetet një lojtar shumë i rëndësishëm për shkak të aftësisë për të luajtur si qendërmbrojtës dhe si mbrojtës i djathtë, drejtuesit nuk e shohin më si të pazëvendësueshëm.
Megjithatë, një gjë tashmë duket e qartë, Jules Kounde nuk konsiderohet më i paprekshëm dhe mund të shndërrohet në një nga emrat më të mëdhenj që mund të largohet nga Barcelona gjatë afatit kalimtar të verës.
