Barcelona ka mbyllur një tjetër vit financiar me rezultate pozitive dhe, për herë të parë në historinë e klubit, ka kaluar kufirin e një miliard eurove të ardhura.
Bordi drejtues i klubit ka caktuar 19 shtatorin si datën e Asamblesë së Përgjithshme të zakonshme dhe të jashtëzakonshme, ku një nga temat kryesore do të jetë financimi i projektit “Espai Barça” dhe punimet në Spotify Camp Nou.
Delegatët e përzgjedhur nga anëtarët e klubit do të votojnë për një sërë çështjesh, ndërsa pika më e rëndësishme pritet të jetë miratimi i një rritjeje të linjës së kreditit të destinuar për përfundimin e projektit të stadiumit dhe infrastrukturës përreth tij.
Sipas gazetës “Sport”, gjatë Asamblesë së Përgjithshme do të miratohet edhe bilanci financiar i vitit të kaluar, siç ndodh tradicionalisht, si dhe buxheti për sezonin 2026/27.
Barcelona regjistron të ardhura rekord
Klubi ka bërë të ditur se e ka mbyllur vitin financiar me “rezultat të zakonshëm pozitiv” për të tretin sezon radhazi.
Megjithatë, ajo që bie më së shumti në sy është niveli rekord i të ardhurave.
Për herë të parë, Barcelona ka kaluar shifrën e një miliard eurove të ardhura vjetore, një moment i rëndësishëm financiar për klubin katalanas.
Një pjesë e konsiderueshme e kësaj rritjeje lidhet me rikthimin dhe shfrytëzimin e Spotify Camp Nou.
Rikthimi në stadiumin e vet ka ndikuar pozitivisht në të ardhurat e klubit, ndonëse Barcelona vazhdon të ketë nevojë për financim shtesë për të përfunduar të gjitha punimet dhe ndryshimet e parashikuara në kuadër të projektit “Espai Barça”.
Vendim i rëndësishëm për financimin e Camp Nout
Gjatë asamblesë, delegatët do të kenë mundësinë të shprehin qëndrimet e tyre dhe të votojnë për propozimet e bordit.
Një nga vendimet kryesore do të jetë nëse duhet të autorizohet kredi shtesë për projektin “Espai Barça”, i cili përfshin rindërtimin dhe modernizimin e Spotify Camp Nou.
Projekti konsiderohet jetik për të ardhmen financiare dhe sportive të klubit, pasi Barcelona synon që stadiumi i rinovuar të gjenerojë të ardhura shumë më të mëdha në vitet e ardhshme.
Do të ratifikohen edhe disa anëtarë të bordit
Delegatët duhet gjithashtu të ratifikojnë emërimin e disa drejtuesve që nuk u larguan nga postet e tyre së bashku me Joan Laportan në procesin zgjedhor.
Në këtë listë përfshihen Rafael Yuste, Josep Cubells, Alfons Castro, Josep Ignasi Macià, Àngel Riudalbas, Joan Solé dhe Sisco Pujol.
Si zakonisht, gjatë asamblesë do të zhvillohet edhe një sesion pyetje-përgjigje, ku delegatët do të mund të kërkojnë sqarime nga drejtuesit e klubit.
Megjithatë, çështjet financiare pritet të dominojnë mbledhjen.
Bordi do të raportojë edhe për merkaton
Përveç financave, drejtuesit e Barcelonës pritet të japin sqarime edhe për aspektin sportiv pas përfundimit të një vere të veçantë në tregun e transferimeve.
Bordi do të prezantojë mënyrën se si është ndërtuar skuadra për sezonin e ri dhe masat e ndërmarra për t’i siguruar ekipit kapacitetin e nevojshëm për të konkurruar në të gjitha frontet.
Kalimi i kufirit të një miliard eurove të ardhura përbën një tjetër sinjal pozitiv për rimëkëmbjen financiare të Barcelonës, por përfundimi i “Espai Barça” dhe financimi i Spotify Camp Nou mbeten sfidat kryesore ekonomike të klubit.
