Trajneri i Real Madridit, Carlo Ancelotti, ka folur për të ardhmen e tij, me 65-vjeçarin që është raportuar disa herë që do të drejtojë ndonjë kombëtare pasi ta përfundojë kontratën e tij te Mbretërit.
Ancelotti udhëhoqi Real Madridin drejt triumfit në LaLiga dhe Ligë të Kampionëve sezonin e kaluar. Megjithatë, me kontratën e italianit që skadon verën e ardhshme, një sërë pikëpyetjesh janë ngritur në lidhje me të ardhmen e tij. Pjesërisht gjatë sezonit të kaluar, Ancelotti ishte i lidhur me një lëvizje në ekipin kombëtar brazilian, megjithatë, 65-vjeçari e refuzoi këtë lëvizje dhe tani ai ka shpjeguar pse nuk e imagjinon të menaxhojë një ekip kombëtar.
Duke folur në podcastin e John Obi Mikel ‘The Obi One’, ai tha: “Ideja ime është që Real Madrid do të jetë klubi im i fundit. Për momentin nuk jam i emocionuar për të drejtuar një ekip kombëtar sepse do të më mungonte ajo që më pëlqen më shumë, punë e përditshme me lojtarët dhe stafin”.
Ancelotti është një nga trajnerët më jetëgjatë në futbollin evropian me italianin që e ka nisur karrierën e tij si trajner në vitin 1992, kur shërbeu si ndihmëstrajner i Arrigo Sacchit. Ai e filloi karrierën e tij si trajner kryesor me Reggiana në vitin 1995 dhe ka drejtuar dhjetë klube deri më tani, duke përfshirë AC Milan, Juventus, Paris Saint-Germain, Bayern Munich dhe Chelsea së bashku me Los Blancos. Ai ka pesë tituj të Ligës së Kampionëve dhe ka fituar gjithsej 28 trofe.
Sezoni i ardhshëm mund të jetë një nga më kërkuesit për italianin pasi skuadra e tij e përforcuar së fundmi me Kylian Mbappen e Endrick, do të kërkojnë akoma më shumë tituj se sezonin që lamë pas.
