Glauk Konjufca, Ministër i Punëve të Jashtme të Kosovës ka reaguar në “X” duke thënë se ndjehet thellësisht i zhgënjyer me Aktgjykimin denues ndaj drejtuesve të UÇK-së me 81 vite burgim.
Konjufca shkroi se beson fuqimisht që Apeli do ta rishikojë Aktgjykimin dhe ta nënshtrojë në një proces rigozor gjyqësor.
Konjufca:
Rezultati i vendimit të sotëm të shpallur nga Dhomat e Specializuara të Kosovës në çështjen që lidhet me Hashim Thaçin, Kadri Veselin, Rexhep Selimin dhe Jakup Krasniqin ka shkaktuar, me të drejtë, zhgënjim të thellë në mbarë Kosovën, një ndjenjë që e ndaj edhe unë personalisht.
Unë besoj fuqimisht se Dhoma e Apelit do t’i nënshtrojë vendimit një shqyrtimi të kujdesshëm dhe rigoroz gjyqësor dhe do të trajtojë, në përputhje me ligjin e zbatueshëm dhe praktikën e konsoliduar, mangësitë ligjore dhe faktike që dalin nga vendimi.
Megjithatë, angazhimi ynë i palëkundur për sundimin e ligjit, parimet demokratike, paqen dhe të ardhmen evropiane të Kosovës mbetet i pandryshuar.
Historia e Kosovës është një histori represioni, rezistence, lufte, humbjeje dhe, në fund, lirie të fituar me shumë sakrifica.
Sot, në rrethanat aktuale, është e vështirë të perceptohet një ndjenjë drejtësie për dhjetëra mijëra gra, burra dhe fëmijë, prej të cilëve më shumë se 95% ishin shqiptarë etnikë, që u vranë, u përdhunuan dhe u torturuan nga forcat ushtarake, paramilitare dhe policore serbe. Për ta, drejtësia nuk erdhi kurrë.
Ne duhet të vazhdojmë të mbrojmë të vërtetën historike kundër çdo shtrembërimi dhe interpretimi dashakeq.
Mbi të gjitha, duhet të mbetemi krenarë për dinjitetin dhe qëndrueshmërinë e popullit të Kosovës, dhe për shtetin që kemi ndërtuar sot: një Kosovë të lirë, demokratike dhe evropiane.
