Ende nuk ka një rritje të madhe të trafikut përmes Ngushticës së Hormuzit, pavarësisht se Presidenti amerikan Donald Trump postoi më herët në platformën e tij Truth Social se “anijet po fillojnë të lëvizin, shumë prej tyre të ngarkuara me naftë”, shkruan BBC.
Të dhënat nga MrineTraffic tregojnë se vetëm një anije ka kaluar plotësisht nga perëndimi në lindje: cisterna japoneze e gazit natyror të lëngshëm, Disha. Ajo u largua nga posti Ras Laffan i Katarit më 13 qershor, e ngarkuar me mall.
Dy anije të tjera duket se po përpiqen të bëjnë të njëjtin kalim – anijet e mallrave Kaiser dhe Blue Ocean 1.
Ne po monitorojmë tetë anije të tjera që kanë kaluar skajin perëndimor të ngushticës dhe një tjetër që po lundron nga zona e Bandar Abbasit në Iran. Është e paqartë nëse ndonjëra prej tyre do të përpiqet të kalojë në Detin Arabik.
Një anije tjetër, MSV Al Fazal, mund të jetë gjithashtu duke kaluar, por pozicioni i saj u zhduk nga MarineTraffic ndërsa ndodhej në veri të Omanit, duke e bërë më të vështirë gjurmimin e vendndodhjes së saj.
Sinjalet mund të zhduken për shkak të mbulimit të dobët ose bllokimit të sinjalit.
Është gjithashtu e mundur që sistemi i gjurmimit të jetë fikur nga ekuipazhi. Sipas rregulloreve të OKB-së, sistemi i gjurmimit të një anijeje duhet të jetë i ndezur në çdo kohë. Përjashtimi i vetëm është kur kapiteni beson se mbajtja e tij ndezur do të përbënte kërcënim për sigurinë e anijes dhe ekuipazhit.
