Dy gjigandët e Serie A, Inter dhe Juventus po pozicionohen si kandidatët kryesorë për të nënshkruar Virgil van Dijk pasi kontrata e tij me Liverpool të përfundojë në fund të këtij sezoni, raportojnë mediat italiane.
Mundësia që mbrojtësi holandez të mos rinovojë me të kuqtë ka ngritur zile alarmi te të dy gjigantët italianë, të cilët shohin një mundësi të artë për të afruar një nga emrat më të lakmuar në tregun e transferimeve.
Qendërmbrojtësi, i cili ende nuk ka arritur marrëveshje me klubin anglez, mund të ketë një sfidë të re në Serie A në duart e tij, një destinacion tërheqës për lojtarin që prej vitesh është referencë në mbrojtjen e Liverpool-it, transmeton albanianpost.
Kontrata e Van Dijk është gati të skadojë, gjë që ka krijuar pasiguri për të ardhmen e tij në “Anfield”. Me vetëm 10 muaj të mbetur nga kontrata e tij aktuale, mbrojtësi 33-vjeçar mund të fillojë negociatat me klube jashtë Anglisë nga janari.
Si Juventus-i ashtu edhe Inter-i po ndjekin nga afër evoluimin e kësaj situate, të vetëdijshëm se koha është në favor të tyre për të arritur një marrëveshje paraprake me një nga mbrojtësit më të mirë në botë.
Nëse Liverpool-i nuk arrin të sigurojë rinovimin e tij, holandezi do të kishte opsionin për t’u transferuar në Itali si lojtar i lirë verën e ardhshme.
Që kur mbërriti te Liverpool në vitin 2018 për një tarifë rekord prej 75 milionë paundë, Van Dijk ka qenë një shtyllë në ekip, duke kontribuar ndjeshëm në sukseset e fundit të klubit, duke përfshirë fitimin e Champions League dhe Premier League.
Megjithatë, faza e re e skuadrës, nën drejtimin e Arne Slot, ka ngritur dyshime për qëndrueshmërinë e disa prej lojtarëve kryesorë, përfshirë edhe vetë Van Dijk.
Pavarësisht se është një titullar i padiskutueshëm, holandezi nuk e ka zyrtarizuar ende angazhimin e tij për të vazhduar në projektin afatgjatë të klubit.
Edhe pse Liverpool shpreson të bindë mbrojtësin për të rinovuar kontratën e tij, thashethemet për një largim të mundshëm intensifikohen me çdo muaj që kalon pa marrëveshje.
Në deklaratat e fundit, Van Dijk shprehu dëshirën për të vazhduar në “Anfield”, gjë që u ka dhënë njëfarë optimizmi tifozëve të skuadrës, por oferta e një sfide të re në Itali mund të jetë joshëse për lojtarin, veçanërisht nëse ai mendon se cikli i tij në Angli është drejt fundit.
