Raportet e së dielës pretendojnë se klube nga Turqia kanë filluar të shfaqin interesim për sulmuesin e “padëshiruar” të Juventusit, yllit të Kosovës, Edon Zhegrovën, i cili pritet të lejohet të largohet pas vetëm një sezoni në klub, shkruan “Football Italia”.
Zhegrova iu bashkua Juventusit në ditën e fundit të afatit kalimtar të verës 2025, duke nënshkruar një transferim të përhershëm me një kosto prej 15 milionë eurosh plus deri në 3 milionë euro bonuse.
Sipas raportimeve, Zhegrova ishte një lojtar i kërkuar posaçërisht nga ish-CEO i Juventusit, Damien Comolli, i cili që atëherë është zëvendësuar nga Giovanni Carnevali në hierarkinë e klubit “Bianconeri”.
Sulmuesi kosovar kishte pësuar një dëmtim serioz në aduktor në janarin para se t’i bashkohej Juventusit, gjë që e mbajti jashtë fushave për gjithë gjysmën e dytë të sezonit 2024-25.
Ky dëmtim duket se ndikoi në fillimin e tij në Torino, dhe në fund ai arriti të luajë vetëm 366 minuta në 19 paraqitje në Serie A, të gjitha si zëvendësues.
Me largimin e Comollit, Juventusi raportohet se është i gatshëm të dëgjojë ofertat për Zhegrovën gjatë këtij afati veror.
Sipas përditësimeve të fundit nga “TMW”, disa klube në Turqi kanë filluar të tregojnë interes për të marrë 27-vjeçarin në një marrëveshje me kosto të ulët.
Trabzonspor thuhet se ka kontaktuar Juventusin për të kërkuar informacione rreth lojtarit.
Ende nuk ka negociata formale, por raporti i së dielës pretendon se ekziston një mundësi e madhe që palët të hyjnë në bisedime gjatë verës.
