Zvicra ka siguruar kualifikimin në fazën e 1/8 së finales në Kupën e Botës, pas fitores 2-0 ndaj Algjerisë në “BC Place”, në përballjen e parë zyrtare mes dy kombëtareve.
Algjeria, që kërkonte fitoren e saj të parë historike në fazën eliminatore të Botërorit, e nisi ndeshjen më mirë dhe pati një mundësi të artë për të kaluar në epërsi. Houssem Aouar u gjend në pozitë të favorshme brenda zonës, por goditja e tij përfundoi larg portës.
Ky rast i humbur iu hakmor shpejt “Dhelprave të Shkretëtirës”, pasi Zvicra kaloi në avantazh që në minutën e 10-të, me goditjen e saj të parë në ndeshje. Johan Manzambi bëri një depërtim fantastik deri në vijën fundore dhe më pas shërbeu saktë në zonën e vogël për Breel Embolon, i cili e shtyu topin në rrjetë për golin e tij të dytë në këtë turne.
Pjesa e parë nuk solli shumë raste të pastra për shënim. Denis Zakaria rrezikoi me kokë për skuadrën e Murat Yakin, por topi kaloi pak mbi traversë. Në anën tjetër, Farès Chaïbi provoi me një goditje që u kontrollua pa shumë vështirësi nga Gregor Kobel. Rasti më i mirë i Algjerisë para pushimit i takoi Ibrahim Mazas, por mungesa e qetësisë në momentin vendimtar bëri që ai të godiste jashtë.
Pjesa e dytë nisi në mënyrën më të mirë të mundshme për Zvicrën. Vetëm pak sekonda pas rifillimit, një largim i dobët i mbrojtjes algjeriane i dha mundësi Dan Ndoye të godiste nga rreth 15 metra. Sulmuesi zviceran nuk gaboi, duke e dërguar topin në këndin e poshtëm dhe duke shënuar golin e tij të nëntë me kombëtaren.
Goli i Ndoye e goditi rëndë moralin e Algjerisë, e cila nuk arriti ta vendoste Zvicrën nën presion serioz në pjesën e dytë. “A-Team Nati” e menaxhoi me qetësi avantazhin dhe madje mund ta kishte mbyllur ndeshjen me rezultat edhe më të thellë. Dhjetë minuta para fundit, zëvendësuesi Fabian Rieder humbi një rast të jashtëzakonshëm, duke goditur drejt në portierin Luca Zidane, edhe pse porta ishte pothuajse e hapur.
Me këtë fitore, Zvicra kalon në mesin e 16 kombëtareve më të mira dhe në raundin tjetër do të përballet me fituesin e çiftit Kolumbi – Ganë. Skuadra e Murat Yakin vjen në këtë fazë me moral të lartë, pasi është e pamposhtur në shtatë ndeshjet e fundit dhe për herë të parë në histori ka arritur të fitojë tri ndeshje radhazi në Kupën e Botës.
Për Algjerinë, aventura në Botëror përfundon këtu. “Dhelprat e Shkretëtirës” tashmë duhet ta kthejnë vëmendjen te kualifikimet për Kupën e Kombeve të Afrikës, të cilat nisin në muajin shtator.
