Kongresmeni Eric Swalwell i ka bërë thirrje Qeverisë së Kosovës që të deskalojë veprimet të cilat ai i quajti “provokuese” në pjesën veriore të vendit. Kongresmeni e drejtoi në mënyrë specifike mesazhin e tij për kryeministrin Albin Kurti, duke i kërkuar atij që të ndalojë menjëherë “përdorimin e masave të dhunshme” dhe të riorientojë fokusin e tij drejt Dialogut të lehtësuar nga BE.
Duke shprehur shqetësimet e tij të thella, kongresmeni Swalwell theksoi rëndësinë e mbajtjes së një qasjeje paqësore dhe zgjidhjes së konflikteve përmes mjeteve diplomatike. Ai i bëri thirrje kryeministrit Kurti që të ketë prioritet dialogun dhe të angazhohet në negociata me të gjitha palët e përfshira.
Swalwell nënvizoi rëndësinë e Dialogut të lehtësuar nga BE-ja, i cili synon të adresojë çështjet e vjetra ndërmjet Kosovës dhe Serbisë.
“Qeveria e Kosovës duhet të deskalojë veprimet e saj provokuese në veri. Kryeministri Albin Kurti duhet të ndërpresë menjëherë këto masa të dhunshme dhe t’i kthejë përpjekjet e tij në Dialogun e lehtësuar nga BE-ja”, – tha Swalwell në Twitter.
Rreth zhvillimeve të fundit në pjesën veriore të Kosovës: Deklarata e kongresmenit Swalwell vjen në mes të tensioneve në rritje në pjesën veriore të Kosovës, ku gjatë ditës së premte pati përleshje midis forcave të sigurisë dhe serbëve lokalë pas përpjekjve të kryetarëve të rinj të komunave veriore për të hyrë në objektet komunale.
Situata ka ngritur shqetësime te aleatët e Kosovës, me frikën se përshkallëzimi aktual mund të çojë në dhunë dhe paqëndrueshmëri të mëtejshme në rajon.
Komuniteti ndërkombëtar në përgjithësi dhe Shtetet e Bashkuara në veçanti dënuan ashpër veprimet e qeverisë Kurti me sekretarin Blinken që i bëri thirrje kryeministrit Kurti t’i ndalojë menjëherë “masat e dhunshme”.
“Dënojmë fuqishëm veprimet e Qeverisë së Kosovës që po përshkallëzojnë tensionet në veri dhe po shtojnë jostabilitetin. I bëjmë thirrje kryeministrit Albin Kurti të ndalojë menjëherë këto masa të dhunshme dhe të ripërqendrohet në Dialogun e lehtësuar nga BE.” – u shpreh ai.