Sot pasdite, në orën 17:00, në sheshin “Skënderbej” në Tiranë do të mbahet një protestë gjithëkombëtare në mbështetje të ish-krerëve të Ushtrisë Çlirimtare të Kosovës (UÇK), të cilët po përballen me akuza në Dhomat e Specializuara në Hagë.
Protesta është organizuar nga Organizata e Veteranëve të Luftës së UÇK-së dhe mbështetet nga qytetarë nga të gjitha trevat shqiptare: Kosova, Shqipëria, Maqedonia e Veriut, Mali i Zi dhe diaspora. Mesazhi kryesor i kësaj proteste është: drejtësi për çlirimtarët, jo padrejtësi për historinë.
Organizatorët kanë bërë thirrje për pjesëmarrje masive dhe paqësore, duke theksuar se protesta nuk ka karakter politik, por është një reagim qytetar dhe kombëtar ndaj asaj që ata e konsiderojnë një padrejtësi historike ndaj luftës çlirimtare të Kosovës.
Sipas tyre, kjo protestë është një zë i përbashkët për të kërkuar trajtim të barabartë dhe të drejtë nga drejtësia ndërkombëtare dhe për të ruajtur dinjitetin e luftës së UÇK-së.
Kësaj proteste i kanë dhënë mbështetje i kanë dhënë pothuajse të gjithë liderët institucionalë dhe partiakë nga të gjitha trojet shqiptare.
