Sekretari i Përgjithshëm i NATO-s, Jens Stoltenberg thotë se i ka thënë presidentit të Turqisë, Recep Tayyip Erdogan se “ka ardhur koha” që Suedia të bëhet anëtare e aleancës ushtarake.
Turqia dhe Hungaria janë të vetmet vende të NATO-s që nuk e kanë miratuar ende zyrtarisht ofertën e Suedisë për anëtarësim.
Stoltenberg i tha Associated Press se ai i kërkoi Turqisë të finalizonte procesin ndërsa u takua me Erdoganin të premten në margjinat e samitit të klimës COP28 në Dubai, transmeton Klankosova.tv.
“Unë u takova me Presidentin Erdogan këtë mëngjes dhe përsërita mesazhin tim se ka ardhur koha për të finalizuar procesin e pranimit për Suedinë”, tha ai.
Turqia e ka vonuar ratifikimin për më shumë se një vit, duke akuzuar Suedinë se nuk i merr mjaft seriozisht shqetësimet e sigurisë së Turqisë, duke përfshirë luftën e saj kundër militantëve kurdë dhe grupeve të tjera që Ankaraja i konsideron si kërcënime të sigurisë.
