Sot nis faza e 1/8 së finales në Kupën e Botës 2026, me dy përballje që premtojnë spektakël dhe rivalitet të madh. Kanadaja do të sfidojë Marokun në duelin e parë të ditës, ndërsa më vonë Paraguai do të përballet me Francën, një nga favoritët kryesorë për triumfin final.
Kanadaja vjen në këtë fazë historike pas një ecurie mbresëlënëse, duke arritur për herë të parë në 1/8 e finales të një Kampionati Botëror.
Përballë do të ketë Marokun, i cili vazhdon të konfirmohet si një nga kombëtaret më të forta të viteve të fundit, pasi siguroi kualifikimin duke eliminuar Holandën pas ekzekutimit të penalltive. Takimi pritet të jetë shumë i luftuar, me kanadezët që do të mbështeten te entuziazmi dhe publiku, ndërsa marokenët te organizimi dhe përvoja në ndeshjet me peshë.
Në mbrëmje, vëmendja do të zhvendoset te sfida mes Paraguait dhe Francës. Paraguai surprizoi në raundin e kaluar duke eliminuar Gjermaninë pas penalltive, ndërsa Franca kaloi me autoritet Suedinë me rezultatin 3-0 dhe konfirmoi statusin e saj si një prej pretendenteve kryesore për trofeun.
Të udhëhequr nga yjet e tyre në repartin ofensiv, francezët konsiderohen favoritë, por Paraguai ka treguar se di të jetë një kundërshtar shumë i vështirë për çdo skuadër.
Dy fituesit e këtyre përballjeve do të ndeshen mes vete në çerekfinale, duke e bërë edhe më të rëndësishme çdo detaj të këtyre dueleve të para të fazës së 1/8 së finales.
