Ambasadori amerikan, Jeff Hovenier ka reaguar pas sulmit në kanalin ujor të Zubin Potokut, i cili dyshohet se ka shpërthyer mbrëmjen e së enjtes.
Hovenier në një shkrim në rrjetin social “X”, ka thënë se ShBA-të dënojnë fuqishëm këtë sulm dhe se kanë ofruar mbështetjen ndaj Qeverisë së vendit.
“Shtetet e Bashkuara dënojnë fuqishëm sulmin e 29 nëntorit në infrastrukturën kritike në Kosovë duke dëmtuar një kanal ujor në Zubin Potok që është thelbësor për furnizimin me ujë të Kosovës dhe funksionimin e termocentraleve të Kosovës. Ne jemi duke e monitoruar situatën nga afër, do të mbështesim një hetim gjithëpërfshirës dhe i kemi ofruar mbështetjen tonë të plotë Qeverisë së Kosovës për të siguruar që personat përgjegjës për këtë sulm kriminal të identifikohen dhe të mbahen përgjegjës.” – ka thënë ai.
Tutje, Hovenier ka shkruar:
“Ne gjithashtu dënojmë sulmet e fundit me granata në stacionin policor të Zveçanit më 26 nëntor dhe në ndërtesën e komunës së Zveçanit më 28 nëntor. Këto veprime të dhunshme nuk kanë vend në një shoqëri demokratike dhe ata që janë përgjegjës për këto sulme kriminale kundër autoriteteve legjitime të Republikës. Kosova duhet të mbajë përgjegjësi.
Shtetet e Bashkuara do të vazhdojnë të solidarizohen me popullin dhe Qeverinë e Kosovës përballë sulmeve të tilla kriminale”.
Ndërkohë, ka reaguar shefi i Zyrës së Bashkimit Evropian në Kosovë, Aivo Orav, i cili ka dënuar sulmin në kanalin e Ibër Lepencit.
Në një shkrim në rrjetin social “X”, ai ka thënë se u ka ofruar ndihmën e BE-së autoriteteve të Kosovës.
Në fund, ai ka kërkuar që përgjegjësit të sillen para drejtësisë.
“Dënoj incidentin e rëndë që shkaktoi dëme në kanalin ujor në Zubin Potok dhe që po privon pjesë të konsiderueshme të Kosovës nga furnizimi me ujë. Unë u kam ofruar ndihmën e BE-së autoriteteve të Kosovës. Ngjarja duhet të hetohet dhe përgjegjësit të vihen para drejtësisë.” – ka shkruar ai.
