Kampioni i saposhpallur i botës me Spanjën, Rodri, dëshiron që Real Madridi të bëjë një ofertë zyrtare për transferimin e tij këtë verë, pasi synon të rikthehet në Spanjë.
Kështu raporton gazetari Ramon Álvarez dhe eksperti i transferimeve, Fabrizio Romano.
Mesfushori 30-vjeçar ka refuzuar disa oferta të majme për rinovimin e kontratës nga Manchester City, duke hapur rrugën për një rikthim të mundshëm në kryeqytetin spanjoll.
Me kontratën e tij që skadon verën e ardhshme, Manchester City ndodhet nën presion të madh për ta shitur këtë verë, nëse nuk dëshiron ta humbasë pa dëmshpërblim.
Dëshira e Rodrit për t’u transferuar në “Bernabéu” vjen menjëherë pasi ai forcoi statusin e tij si një nga mesfushorët më të mirë të futbollit modern me paraqitjet në Kupën e Botës 2026.
Si kapiten i Spanjës, Rodri e udhëhoqi kombëtaren drejt titullit të dytë kampion bote në histori, duke qenë protagonisti kryesor i rrugëtimit të pandalshëm të “La Rojas”.
Qetësia, lidershipi dhe dominimi i tij taktik në çdo ndeshje u shpërblyen me Topin e Artë të Kupës së Botës, çmim që i jepet lojtarit më të mirë të turneut.
Rodri vendosi gjithashtu një rekord historik në Botëror, duke kompletuar 648 pasime, më shumë se çdo futbollist tjetër në historinë e turneut, ndërsa ishte motori i mesfushës spanjolle dhe lojtari që diktoi ritmin në çdo sfidë të rëndësishme.
Pavarësisht përpjekjeve të mëdha të Manchester Cityt për ta bindur të vazhdojë kontratën, drejtuesit e klubit nuk kanë bërë përparim në negociata.
Rodri ka refuzuar vazhdimisht ofertat për rinovim, pasi më herët kishte vendosur ta shtynte çdo vendim për të ardhmen deri në përfundimin e Kupës së Botës në Amerikën e Veriut.
Sipas raportimit, mesfushori është shumë i interesuar që Real Madridi të bëjë një ofertë konkrete.
Megjithatë, sinjalet që vijnë nga drejtuesit e klubit madrilen mbeten të përziera.
Burime pranë dhomës së zhveshjes së Real Madridit kanë vlerësuar se Rodri do të ishte një përforcim i jashtëzakonshëm për mesfushën e skuadrës.
Nga ana tjetër, bordi drejtues i klubit vazhdon të mbajë qëndrimin se spanjolli nuk bën pjesë në planet aktuale të merkatos dhe nuk dëshiron të përfshihet në një sagë publike transferimi.
Megjithatë, me refuzimet e njëpasnjëshme ndaj Manchester Cityt dhe pas suksesit të madh në Kupën e Botës, topi tani është në fushën e Real Madridit për të vendosur nëse do të shfrytëzojë momentin dhe do të tentojë transferimin e Rodrit.
