Rita Ora është frymëzuar nga legjenda e muzikës country, Dolly Parton, për kostumin e saj të Halloween-it këtë vit, duke u shndërruar në ikonën e muzikës për një festë të mbajtur të premten në New York.
Këngëtarja 35-vjeçare mori pjesë në festën e Halloween-it të organizuar nga The Frankie Shop në metropolin amerikan, ku u shfaq me një bluzë të shkurtër dhe dekolte të hapur, shkruan DailyMail.
Dolly Parton ndërroi jetë në gusht, në moshën 80-vjeçare, pas një beteje të shkurtër me kancerin. Lajmi për vdekjen e saj nxiti reagime dhe homazhe nga emra të shumtë të industrisë muzikore.
Rita solli në vëmendje edhe një tjetër element karakteristik të pamjes së Dolly Parton, modelin ikonik të flokëve biondë, të ngritur në formë voluminoze. Për këtë, ajo kishte vendosur një paruke që imitonte stilin e njohur të këngëtares.
Paraqitja e saj tërhoqi vëmendje edhe së fundmi, kur Rita ishte në krah të bashkëshortit të saj, Taika Waititi, në premierën e filmit të tij të ri, “Klara and the Sun”.
Ajo u shfaq në tapetin e kuq të Festivalit të Filmit në Londër, të organizuar nga BFI, me një fustan të zi dantelle dhe një aksesor të madh e të pazakontë në kokë.
Rita tërhoqi vëmendjen me stilin ekstravagant, duke kombinuar fustanin transparent prej dantelle, me fund voluminoz, me një aksesor në formë gjembash.
Krahas pozimit përkrah bashkëshortit të saj, këngëtarja u fotografua edhe me aktoret e filmit, Jenna Ortega dhe Amy Adams.
Dalja e saj publike vjen pasi u bë e ditur se Rita po përballet me një padi nga ish-menaxherja e saj, e cila po kërkon 3.2 milionë funte, nën pretendimin se këngëtarja nuk i ka paguar kompanisë përqindjen e saj nga të ardhurat
Rita i ndërpreu bashkëpunimin menaxheres Sarah Stennett në vitin 2024, pas një marrëdhënieje profesionale që kishte nisur në vitin 2009. Në atë kohë, ishte raportuar se ndarja kishte ardhur si pasojë e mosmarrëveshjeve lidhur me drejtimin që duhej të merrte karriera e këngëtares.
Megjithatë, situata ka marrë një kthesë tjetër, pasi themeluesja e kompanisë FAE Ventures ka paraqitur një padi në Gjykatën e Lartë, duke pretenduar se biznesi i saj ka miliona funte të papaguara. Kështu, palët tashmë janë përfshirë në një betejë ligjore.
Sipas pretendimeve të kompanisë, Rita, e cila kishte nënshkruar kontratën e parë me kompaninë e Sarah Stennett kur ishte vetëm 18 vjeçe, nuk ka paguar përqindjen që i takonte kompanisë nga të ardhurat e përfituara prej turneve muzikore dhe angazhimeve televizive.
Shuma e pretenduar arrin rreth 3.2 milionë funte, ndërsa në dokumentet e dorëzuara thuhet se Rita ka shkelur kushtet e kontratës duke mos paguar pjesën që i takonte kompanisë.
Sipas gazetës “The Sun”, shuma më e madhe e pretenduar si pagesë e papërmbushur është pak më shumë se 1.7 milionë funte. Kompania e Sarah Stennett pretendon se janë bërë zbritje të palejuara për shërbime profesionale, përfshirë reklamat, kontabilitetin dhe sigurimet.
Një tjetër pretendim, në vlerë prej 1.1 milion funte, lidhet me të ardhurat nga turnet muzikore që dyshohet se nuk janë raportuar gjatë periudhës nga pranvera e vitit 2019 deri në vitin 2020, kur Rita ishte në turneun e saj botëror “Phoenix”.
Në dokumentet e dorëzuara thuhet se pagesat ndaj FAE nuk kanë përfshirë disa të ardhura nga turneu, të cilat këngëtarja i kishte përfituar personalisht ose përmes palëve që vepronin në emër të saj gjatë asaj periudhe.
DailyMail ka kontaktuar përfaqësuesit e Sarah Stennett dhe Rita Orës për një koment lidhur me rastin, por deri më tani nuk ka marrë përgjigje. /Telegrafi/
