Me rastin e përmbylljes të ushtrimit fushor (UF) “Defender Europe 25” Komandanti i Forcës së Sigurisë së Kosovës (KOMFSK), gjenerallejtënant Bashkim Jashari mori pjesë në Ditën e Vizitorëve të Shquar (DV Day) në Republikën e Shqipërisë.
Fillimisht, gjeneral Jashari u prit nga shefi i Shtabit të Forcave të Armatosura të Republikës së Shqipërisë (FARSH) gjenerallejëtnant Arben Kingji, i cili e njoftoi për rrjedhën e ushtrimit dhe nivelin e lartë të bashkëpunimit ndërmjet FARSH-së dhe njësive të FSK-së të angazhuar në kuadër të Brigadës Shumëkombëshe të Lindjes (MNB-E).
Gjatë kësaj vizite, GLT-ja Jashari gjithashtu vizitoi trupat e kontingjentin të FSK të angazhuar në Republikën e Shqipërisë, i përbërë nga togu i mortajave, vlerësuesit dhe oficerët shtaborë në kuadër të komandës së brigadës, ku u njoh nga afër me zhvillimet e aktiviteteve të përbashkëta dhe arritjet gjatë këtij ushtrimi.
Ai përgëzoi pjesëmarrësit për përkushtimin e tyre gjatë kësaj kohe, duke theksuar rëndësinë e pjesëmarrjes së FSK-së në një ushtrim të nivelit të DE25, si dhe ngritjen e aftësive të njësive të FSK-së që të operojnë në një mjedis shumëkombësh operacional.
