Kryeministri i Izraelit, Benjamin Netanyahu, ka pretenduar në një intervistë telefonike me mediumin proqeveritar, “Channel 14”, se Irani është përpjekur që t’ia vrasë njërin nga dy bijtë e tij.
“Irani u mundua ta vriste njërin prej bijve të mi” – tha Netanyahu, pa dhënë hollësi të mëtejme, transmeton gazeta “The Times of Israel”.
“Prandaj, siguria që u ofrohet atyre nuk është luks” – shtoi ai, duke u dukur se po mbronte një marrëveshje me shërbimin Shin Bet për t’u dhënë bijve dhe gruas së tij mbrojtje për të paktën pesë vjet, edhe në rast se ai i humb zgjedhjet e këtij viti.
Nuk është e qartë se cili prej bijve të Netanyahut – Yair apo Avner – ishte gjoja në shënjestër, ose kur apo si ka ndodhur përpjekja e pretenduar për vrasje.
Avner jeton në Izrael. Yair, i cili është më i njohur, ka kaluar një pjesë të madhe të viteve të fundit në Miami të Shteteve të Bashkuara dhe njihet për komentet e tij djathtiste.
