Sekretarja e Përgjithshme e PDK-së, Vlora Çitaku, ka uruar Ditën e Pavarësisë së Shteteve të Bashkuara të Amerikës, duke ndarë një rrëfim personal që, sipas saj, pasqyron mirësinë dhe përkushtimin e amerikanëve.
Përmes një postimi në rrjetet sociale, Çitaku tha se Amerika nuk është vetëm një vend i madh apo i fuqishëm, por edhe një vend që dallohet për mirësinë e njerëzve të saj.
“Urime 4 Korriku! Amerika nuk është vetëm e madhe. As vetëm e fuqishme apo e pasur. Amerika është e mirë sepse amerikanët janë të tillë. Qofshin të pasur apo të varfër, me pushtet apo pa të, ajo që i bën të veçantë është mirësia”, tha ajo.
Çitaku tregoi se nipërit e saj, gjatë një dreke në një piceri, takuan një grup ushtarësh amerikanë.
Sipas saj, ata i përshëndetën dhe i falënderuan ushtarët për shërbimin e tyre, ndërsa njëri prej ushtarëve, nga Teksasi, vendosi t’i surprizojë duke u vizatuar një karikaturë si kujtim.
“Kam jetuar shtatë vite në SHBA dhe e kam ndjerë këtë mirësi çdo ditë. Dje, e ndjenë edhe nipërit e mi. Derisa Arbëri dhe Dielli po drekonin me prindërit, në piceri hyn një grup ushtarësh amerikanë. Me kureshtje dhe respekt, nipat i përshëndesin dhe i falënderojnë për shërbimin”.
“Njëri prej tyre, ushtar nga Teksasi, larg familjes së tij për t’u kujdesur për sigurinë tonë, vendos t’i falënderojë ata: duke u vizatuar një karikaturë si kujtim. Thank you. Për mirësinë. Për sakrificën. Për shpresën që përçoni”, shkroi Çitaku.
