Ish-mjekja e Ushtrisë Çlirimtare të Kosovës, Time Kadrijaj, ka ndarë një rrëfim tejet emocional dhe prekës për përjetimet e rënda gjatë luftës, duke kujtuar sakrificën sublime të të rinjve që u flijuan për lirinë e vendit.
E ftuar në emisionin “Sol” në Klan Kosova, Kadrijaj nuk i ka mbajtur lotët teksa ka përshkruar guximin e pashoq të ushtarëve të UÇK-së në vijat e para të frontit.
Ata kanë qenë djem të rinj, me vullnet, me plot energji, që s’e kanë ditur çka është frika, që kanë dalë në vijat e para të frontit duke kënduar. Edhe ndoshta në mbrëmje s’janë kthyer fare”, është shprehur Kadrijaj e përlotur, duke theksuar se sot i dhemb shpirti për mënyrën se si trajtohen këta njerëz.
Ajo ka zbuluar detaje rrëqethëse nga përballja me plagët e luftës dhe mungesën ekstreme të pajisjeve mjekësore. Siç tregoi ajo, transfuzioni i gjakut bëhej direkt nga njeriu te njeriu, ndërsa në raste emergjente u është dashur të bëjnë ndërhyrje drastike me mjete rrethanore për t’ua shpëtuar jetën ushtarëve.
Dikujt prej ushtarëve dora i është prerë me sharrë të drurit… Nëse s’i kish prerë ajo dorë prej granatave, ai kish vdekur krejt. Është i gjallë, i ka mbijetuar pa atë dorë. Ushtarë që sot kur i shoh, befasohem që janë gjallë, nuk e di qysh kanë mundur t’i përballojnë ato plagë”, rrëfeu ajo.
Kadrijaj ka kujtuar edhe takimin e parë me Ramush Haradinajn në vijat e para të frontit, duke vlerësuar angazhimin e tij për ngritjen e një salle të improvizuar operacioni me kirurgë dhe vullnetarë, si dhe mobilizimin e grave që ushqenin ushtarët mes krismave.
