Vetëm 50 metra larg nga dritarja, ku kreu i Leposaviqit Lulzim Hemtimi vëzhgoi për muaj të tërë situatën në komunën e tij, komuniteti serb atje krejt qetësisht zhvillon veprimtari ilegale.
Njëjtë sikurse në Graçanicë e Mitrovicë të Veriut, me dinarin serb mund të blesh e të shesësh gjëra, edhe pse një gjë e tillë ndalohet me ligjet në fuqi.
Këtë radhë, KIKS Kosova, provoi qarkullimin e dinarëve të Serbisë nëpër librari, dhe shumë lehtë bleu pajisjet shkollore.
Kjo librari e vogël, që është shumë afër objektit të komunës përveç që qarkullonte dinarin ilegalisht, as nuk dha dëshmi që të paktën i paguan tatim shtetit të Kosovës, pasi nuk lëshoi kupon fiskal.
Pa e ditur që po fliste më gazetarët, shitësja shprehet se rrallë herë u del problem me inspekcionin, ngase po shisnin produktet e tyre me kartëmonedha serbe.
Mitrovica e Veriut, Graçanica e Leposaviqi duket se ende nuk kanë marrë masat e duhura sa i përket ndalimit të qarkullimit të dinarit serb, i cili vendim u mor në shkurt të vitit të kaluar nga Qeveria e Kosovës në bashkëpunim me Bankën Qendrore të Kosovës.
