Ndërsa po përgatitet për atë që me shumë gjasë do të jetë Kupa e fundit e Botës në karrierën e tij, Lionel Messi është pranë thyerjes së një prej rekordeve më prestigjioze në historinë e turneut.
Legjenda argjentinase ka në shënjestër rekordin e ish-sulmuesit gjerman Miroslav Klose për numrin më të madh të fitoreve individuale në ndeshje të Kupës së Botës, ndërsa rivali i tij afatgjatë, Cristiano Ronaldo, përballet me një sfidë shumë më të vështirë për t’u futur në këtë garë.
Aktualisht, rekordi mbahet nga Klose, i cili grumbulloi 17 fitore në 24 ndeshje me Gjermaninë gjatë Kupave të Botës 2002, 2006, 2010 dhe 2014.
Menjëherë pas tij vjen Messi me 16 fitore në 26 ndeshje të Kupës së Botës, të zhvilluara në edicionet 2006, 2010, 2014, 2018 dhe 2022.
Yllit të Inter Miamit i duhet vetëm një fitore në fazën e grupeve të Kupës së Botës 2026 për të barazuar rekordin e Kloses, gjë që e bën shumë të mundshme që ai të vendosë një rekord të ri historik edhe para fillimit të fazës me eliminim direkt.
Në vendin e dytë së bashku me Messin ndodhet edhe legjenda braziliane Cafu, i cili arriti 16 fitore në vetëm 20 paraqitje në Kupat e Botës 1994, 1998, 2002 dhe 2006.
Sa i përket Ronaldos, rruga drejt rekordit është shumë më e komplikuar.
Kapiteni i Portugalia ka aktualisht 10 fitore në Kupat e Botës, të arritura në 22 ndeshje gjatë pesë edicioneve radhazi nga 2006 deri në 2022.
Për të barazuar Klosen, Ronaldos i duhen edhe shtatë fitore të tjera.
Megjithatë, zgjerimi i Kupës së Botës në 48 skuadra i jep atij një mundësi shtesë. Turneu i vitit 2026 do të ketë një fazë të re të 1/32-ës së finales, që do të thotë se skuadrat që arrijnë deri në gjysmëfinale ose finale mund të luajnë deri në tetë ndeshje në total, në vend të shtatë si më parë.
Në teori, nëse Portugalia zhvillon një turne të shkëlqyer dhe arrin shumë fitore, Ronaldo mund ta kapërcejë rekordin e Kloses.
Megjithatë, edhe një rrugëtim perfekt i Portugalisë mund të mos mjaftojë për t’i dhënë atij rekordin absolut, pasi Messi ndodhet në një pozicion shumë më të favorshëm dhe ka gjasa të bëhet lojtari me më shumë fitore në historinë e Kupës së Botës që në fazën e grupeve të këtij turneu.
