Rastet kur persona të ndryshëm kërkojnë ndihmë në institucionet mjekësore për shkak të lëndimeve që pësojnë në vendet e tyre të punës nuk janë të rralla. Ato shpesh herë ndodhin si pasojë e kushteve të këqija që ofrojnë kompanitë, por me raste janë edhe aksidentale.
Një rast i tillë ka ndodhur dje në fabrikën e bllokave në Mamushë, ku një punëtor turk (rreth 53-vjeçar) ka pësuar lëndime të rënda, duke këputur këmbën e djathtë gjatë punës me makineritë e fabrikës.
Me të marrë lajmin, njësitet policore kanë dalë menjëherë në vendin e ngjarjes.
Ndërkaq, kolegët e viktimës kanë treguar se pas aksidentit e kanë dërguar të lënduarin në Spitalin Rajonal të Prizrenit për trajtim të menjëhershëm.
Si pasojë e lëndimeve të rënda, viktima i është nënshtruar një operacioni.
Në lidhje me rastin është informuar Komandanti i Stacionit dhe Shefi i Hetimeve, të cilët kanë dalë në vendngjarje për të kryer hetime të mëtejshme./Sinjali
