Kryetari i Drenasit nga PDK-ja, Ramiz Lladrovci, ka kritikuar Qeverinë për insistimin për ta hapur Urën e Ibrit për qarkullim të automjeteve.
Ai iu drejtua qeveritarëve që të mos provokojnë situata që s’mund t’i qeverisin.
“Kësaj situate më së miri i shkon fjala e urtë “tuj u mundue me ia ndreq vetullat, ia nxjerr sytë”. Patriotizmi i vonuar dhe “gjyksat” në këtë kohë, bëjnë dëm. Mos provokoni situata që nuk mund i qeverisni. Pa aleatët, nuk do të arrinim deri këtu, kujdes!”, ka shkruar Lladrovci.
Ai shton se loja me durimin e ndërkombëtarëve i kushton shtetit.
Postimi i plotë:
Tuj u mundue me ndreq vetulla, mos ia lëndoni sytë Kosovës.
Ura e Mitrovicës, është simbol i dhimbshëm në shtatin e Kosovës shtet. U vu nga forca madhore, forcë e cila na ndihmoi ta kemi shtetin me 10.905 kilometra katrorë, të njohur me më shumë se 115 shtete.
Loja me durimin e ndërkombëtarëve i kushton shtetit dhe kjo nuk duhet të bëhet nga kushdo që ia do të mirën Kosovës.
Zgjedhjet shkojnë e vinë, por, betonimin e urës si shenjë e ndarjes, në çfarëdo rasti do të garantohej nga forcat e KFOR-it. Ura për këmbësorë sot është e lirë. Kjo “trimëri” nuk i ka hije asnjë lideri që e mendon të tashmen e të ardhmen e Republikës së Kosovës.
Kësaj situate më së miri i shkon fjala e urtë “tuj u mundue me ia ndreq vetullat, ia nxjerr sytë”.
Patriotizmi i vonuar dhe “gjyksat” në këtë kohë, bëjnë dëm. Mos provokoni situata që nuk mund t’i qeverisni. Pa aleatët, nuk do të arrinim deri këtu, kujdes!
