Robert Lewandowski duket gjithnjë e më pranë largimit nga Barcelona në fund të kontratës së tij në qershor, duke hapur derën për një kapitull të ri në karrierë.
Sulmuesi 37-vjeçar pritet të refuzojë ofertën për rinovim nga klubi katalanas, çka do t’i japë lirinë për të zgjedhur vetë destinacionin e ardhshëm.
Edhe pse më herët ishte përmendur një kalim i mundshëm në MLS, me Chicago Fire që i kishte bërë ofertë në shkurt, sipas raportimeve nga “The Athletic” dhe “Mundo Deportivo”, kjo pistë tani është pothuajse e mbyllur.
Lewandowski besohet se ka ngushtuar opsionet e tij në vetëm dy: të qëndrojë te Barcelona ose të transferohet në Serie A.
Ai nuk e sheh më MLS si një opsion tërheqës për momentin.
Në rast largimi, disa klube italiane janë në garë për të siguruar shërbimet e tij.
Juventusi tashmë ka zhvilluar bisedime me përfaqësuesit e tij, ndërsa interes kanë shfaqur edhe Interi dhe Milani.
Një kusht i rëndësishëm për Lewandowskin është që klubi i tij i ardhshëm të marrë pjesë në Ligën e Kampionëve.
Aktualisht, të tri klubet italiane janë në rrugë të mirë për kualifikim, megjithëse Juventusi ende rrezikon të tejkalohet nga Como ose Roma në renditje.
E ardhmja e Lewandowskit mbetet e hapur, por gjithçka tregon se ajo do të vendoset mes Barcelonës dhe një aventure të re në Itali.
