Gjykata Administrative Rajonale e Milanos (TAR) ka rrëzuar të gjitha ankesat kundër shitjes së zonës së “San Siros” te Milani dhe Interi, duke i hapur rrugë planeve të klubeve për ndërtimin e një stadiumi të ri.
Dy gjigantët e Serie A kanë marrë një shtysë të rëndësishme në përpjekjet e tyre për të ndërtuar një stadium të ri pranë “Stadio Meazza” ekzistues.
Siç raporton “ANSA”, TAR-i i Milanos ka hedhur poshtë pesë ankesa të paraqitura nga shoqata dhe qytetarë privatë, të cilët kundërshtonin blerjen e zonës së San Siros nga klubet.
Milani dhe Interi konfirmuan blerjen e “Stadio Meazza” dhe zonave përreth në nëntor të vitit 2025, duke nisur në mënyrë efektive numërimin mbrapsht drejt ndërtimit të stadiumit të tyre të ri në atë zonë.
Kishte shqetësime se ankesat mund ta vononin apo edhe ta ndalonin projektin, por vendimi i së martës shënon një tjetër hap të rëndësishëm drejt ndërtimit të “San Siros” së ri.
Gazzetta raportoi disa javë më parë se Milani dhe Interi synojnë të prezantojnë një pamje të projektit të stadiumit të ri përpara nëntorit, ndërsa punimet pritet të nisin verën e ardhshme.
Dy klubet milaneze shpresojnë ta përfundojnë stadiumin deri në vitin 2031, në mënyrë që ai të mund të presë ndeshje të Euro 2032, turne që Italia do ta bashkëorganizojë me Turqinë.
Meqë “Stadio Meazza” aktual ka dështuar në inspektimet e UEFA-s për turneun, stadiumi i ri mbetet i vetmi impiant i propozuar nga Milani për Euro 2032.
