Kylie Minogue ka tërhequr vëmendjen me paraqitjen e saj elegante dhe rinore në numrin e shtatorit të “Vogue Australia”, ku 58-vjeçarja pozon në një set fotografik të kuruar për revistën prestigjioze të modës.
Ylli australian i muzikës pop shfaqet në kopertinë me një këmishë ku shkruhet “I work nights”, ndërsa në fotografitë e tjera të realizuara për revistën paraqitet me një fustan transparent prej dantelle me korse, si dhe me një veshje sportive bardhezi që thekson linjat e saj.
Por përveç modës, intervista ka tërhequr vëmendje edhe për një histori që Kylie tregoi për një natë të kaluar në Los Angeles me aktoren tjetër australiane, Margot Robbie.
Një takim spontan në Chateau Marmont
Kylie tregoi se kishte dëgjuar se Robbie ndodhej në Los Angeles dhe vendosi t’i shkruante për ta ftuar për një takim në Chateau Marmont, një nga vendet më të njohura të Hollywood-it.
E pyetur se cili ishte australiani më argëtues me të cilin kishte pirë ndonjëherë, Minogue tha se Margot ishte padyshim një nga emrat që i vinte në mendje.
“Herën e parë që takova Margot, patjetër që pimë disa gota. Ishim vetëm ne të dyja në Chateau Marmont”, rrëfeu Kylie.
Ajo kishte parë Robbie-n disa ditë më parë në të njëjtin vend, gjatë një takimi pune, dhe kishte menduar se ndoshta aktorja ndodhej vetëm në qytet.
“Kështu që i shkrova: ‘Hej, ka edhe një australiane tjetër në qytet. A do të takohemi?’”
Takimi kishte ndodhur rreth vitit 2016, shumë përpara suksesit të jashtëzakonshëm të filmit “Barbie”.
Margot mendoi se po e ftonte për punë
Minogue tregoi se Robbie më vonë i kishte pranuar se fillimisht mendonte se ftesa kishte të bënte me ndonjë aktivitet bamirësie apo projekt profesional.
Por në të vërtetë, ideja ishte shumë më e thjeshtë.
“Ishte fjalë për fjalë: ‘Hej, të dyja jemi australiane në Los Angeles’”, tha Kylie.
“Pastaj pimë… nuk e di nëse u dehëm plotësisht, por patjetër pimë aq sa të relaksoheshim.”
Dikur më shumë net të çmendura, sot shumë më pak
Kylie pranoi se në të kaluarën kishte pasur shumë net të mbushura me aventura dhe argëtim, përfshirë dalje me aktorët australianë Nash dhe Joel Edgerton.
Megjithatë, sot ajo thotë se ritmi i saj i jetës është shumë më i qetë.
“Ka kaluar shumë kohë që kur jam dehur vërtet. Tani më duket si diçka për njerëz më të rinj”, u shpreh ajo.
25 vjet nga një prej pamjeve më ikonike të saj
Intervista vjen në një periudhë të veçantë për Minogue, e cila së fundmi riktheu në vëmendje një nga momentet më të famshme të karrierës së saj.
Ajo publikoi fotografi të vjetra me kostumin e bardhë ikonik nga videoklipi i këngës “Can’t Get You Out Of My Head”, duke shënuar 25-vjetorin e një prej hiteve të saj më të mëdha.
Kënga ka arritur gjithashtu shifrën e një miliard dëgjimeve në Spotify.
E shkruar dhe prodhuar nga Cathy Dennis dhe Rob Davis, kënga e vitit 2001 arriti vendin e parë në listat muzikore të 40 vendeve.
Kostumi që hyri në historinë e pop-it
“Can’t Get You Out Of My Head” u bë e pandashme edhe nga veshja e bardhë me kapuç dhe dekolte të thellë që Kylie përdori në videoklip.
Kostumi ishte krijuar nga stilistja me bazë në Londër Fiona “Fee” Doran, nën markën Mrs Jones.
Edhe sot, më shumë se dy dekada më vonë, ajo veshje vazhdon të konsiderohet një nga momentet më të njohura dhe më të paharrueshme të modës në historinë e muzikës pop.
