Kryeministri i Polonisë, Mateusz Morawiecki deklaroi se duan të krijojnë një nga ushtritë më të forta tokësore të Evropës, transmeton Anadolu.
Morawiecki me kryeministrin e Koresë së Jugut, Han Duck-soo zhvilloi konferencë të përbashkët për media në Bazën e 23-të Ajrore Taktike, 50 kilometra në lindje të kryeqytetit Varshavë.
Ai tha se Polonia dhe Koreja e Jugut janë dy vende mike. “Ne punojmë së bashku për sigurinë në Evropë, Azi dhe të gjithë botën”, theksoi Morawiecki.
Kryeministri polak bëri të ditur se në Poloni kanë mbërritur tanket e para K2 dhe obusët K9 që morën vitin e kaluar nga Koreja e Jugut, ndërsa rikujtoi se në muajin korrik u morën në dorëzim avioni i parë FA-50 dhe në gusht lëshuesi i parë Chumnoo.
Ai informoi se vëllimi tregtar vitin e kaluar mes dy vendeve arriti në 10 miliardë dollarë dhe se në Poloni janë 600 kompani koreano-jugore. “Duam të krijojmë një nga ushtritë më të forta tokësore të Evropës. Sot duam të përfitojmë nga ata që kanë teknologji të nivelit të lartë. Partneriteti ynë strategjik me Korenë e Jugut i shërben këtij qëllimi”, tha Morawiecki.