Presidenti i Federatës Portugeze të Futbollit, Pedro Proenca, po përgatitet të zhvillojë një takim urgjent me trajnerin e Portugalisë, Jorge Jesus, dhe kapitenin Cristiano Ronaldo, me synimin për të zgjidhur krizën rreth këtij të fundit.
Ronaldo e kaloi të gjithë ndeshjen e fundit ndaj Norvegjisë në bankën rezervë, në një përballje të raundit të dytë të Ligës së Kombeve, të cilën Portugalia e fitoi 2-1.
“Don” ishte i tërbuar. Ylli portugez mungoi në stërvitjen e kombëtares të martën, duke u kthyer në hotelin e ekipit për të ushtruar në palestër.
Vetëm një javë më parë, sulmuesi i Al-Nassrit ishte zotuar se do të ishte në shërbim të Portugalisë.
“Jam këtu për të ndihmuar, pavarësisht nëse luaj apo jo”, kishte thënë ai.
“Jam vetëm njëri prej shumë lojtarëve. Kështu ka qenë gjithmonë dhe kështu do të mbetet. Do ta them përsëri, do të bëj gjithçka që kërkon trajneri: të luaj, të dal nga loja, apo edhe të mos luaj. Nderi i përfaqësimit të Portugalisë është mbi çdo gjë tjetër”, shtoi ai.
Gjashtë ditë më vonë, ato fjalë të fuqishme ishin zhdukur. Ronaldo u përball me një valë kritikash për mungesën e rrezikshmërisë në sulm në fitoren 1-0 ndaj Uellsit dhe, pasi numri 7 u kritikua ashpër, ai përjetoi diçka që nuk e kishte përjetuar prej 18 vitesh.
Kundër Norvegjisë, Jesus e mbajti në bankën rezervë gjatë gjithë ndeshjes. Vendimi e la Ronaldon me fytyrë të zymtë para kamerave. Pas ndeshjes, trajneri pranoi se i kishte thënë yllit të tij se do ta aktivizonte si zëvendësues, por më pas e ndryshoi fjalën.
“Nuk e kuptova se ishte i mërzitur”, tha Jesus pas ndeshjes.
“Vetëm ai mund t’i përgjigjet kësaj. Ajo që është e sigurt është se të mos e aktivizosh nuk do të thotë se nuk mbështetem te ai. Në fakt, para ndeshjes i thashë: ‘Nuk do të të aktivizoj nga fillimi, por do të të fus si zëvendësues.’ Ky është futbolli: ai imponon rregullat e veta dhe, në këtë rast të veçantë, nuk kishte arsye për ta ndryshuar sulmuesin, duke pasur parasysh se kemi një ndeshje në Danimarkë dhe se ai mund të jetë zgjedhja e parë për atë ndeshje”, tha ai tutje.
Teksa Portugalia u vendos në bazën e saj në qytetin suedez Malmo, pikërisht në kufi me Kopenhagën, Ronaldo tërhoqi vëmendjen e mediave portugeze. Ai u shfaq në fushën e stadiumit “Eleda” gjysmë ore para stërvitjes, shkëmbeu disa fjalë me Jesusin dhe më pas u kthye në hotel.
Federata Portugeze dha një shpjegim zyrtar: Malmo FC nuk e ka pajisjen që i nevojitet Ronaldos për stërvitjen individuale.
Jesus foli shkurtimisht për atë bisedë pas stërvitjes.
“Unë flas me Cristiano Ronaldon çdo ditë, çdo minutë”, tha ai.
Trajneri mohoi se kishte ndonjë mosmarrëveshje me lojtarin e tij. Megjithatë, mediat portugeze raportuan të martën në mbrëmje se presidenti i federatës, Pedro Proenca, kishte ndryshuar urgjentisht planin e tij.
Proenca ishte paraparë të ishte në Azore të mërkurën për të ndjekur nga afër ndeshjen e ekipit U21 ndaj Gjibraltarit, një fitore që do t’ia siguronte skuadrës së re portugeze kualifikimin në Kampionatin Evropian U21.
Prej atje, ai duhej të udhëtonte drejt Danimarkës të enjten, në ditën e përballjes së kombëtares së seniorëve me skandinavët. Në vend të kësaj, sipas mediumit francez “Foot Mercato”, Proenca po e anashkalon tërësisht udhëtimin në Azore dhe po shkon drejtpërdrejt në Kopenhagë për të zhvilluar një takim urgjent me Jesusin dhe Ronaldon në Malmo.
