Drejtoria e Krimeve Ekonomike dhe Korrupsionit e Policisë së Kosovës në Gjakovë pas informatës për tre persona të cilët dyshoheshin se kishin marrë ryshfet nga biznese të ndryshme ka realizuar një aksion, me çrast ka arrestuar ata dhe të njëjtit janë ndaluar për 48 orë.
Sipas komunikatës së policisë, tre të dyshuarit dyshohet se kanë kryer veprën penale “Marrja e Ryshfetit”.
“Policia e Kosovës, respektivisht Drejtoria për Hetimin e Krimeve Ekonomike dhe Korrupsionit (DHKEK), Njësia Rajonale në Gjakovë, ka pranuar informatë se tre të dyshuar në periudha të ndryshme kohore dhe në lokacione të ndryshme në Gjakovë, kishin kërkuar dhe pranuar ryshfet nga pronarë të ndryshëm të bizneseve, ku me këto veprime dyshohet se kanë kryer veprën penale ”Marrja e Ryshfetit’’ neni 421 i KPRK-së.
Policia e Kosovës në koordinim me Prokurorinë Themelore në Gjakovë, ka ndërmarr veprime hetimore, duke zbatuar edhe masat të avancuara hetimore, gjatë të cilave janë siguruar dëshmi se tre të dyshuarit meshkuj kosovarë, me qëllim të përfitimit pasuror për vete apo personin tjetër, dyshohet se kanë pranuar ryshfet në shuma të ndryshme parash në disa raste të ndara, si dhe të mira materiale të ndryshme pa pagesë nga pronaret e bizneseve të ndryshëm në komunën e Gjakovës”, thuhet në njoftim.
Policia ditën e sotme ka bastisur shtëpitë e tre të dyshuarve, dy në Gjakovë dhe një në Pejë, me çrast ka sekuestruar para të gatshme, telefona pasaportë dhe letërnjoftim të Shqipërisë.
“Sot, më datë 20.01.2025, me Urdhër nga Gjykata Themelore në Gjakovë në koordinim me prokurorin përgjegjës të rastit janë kontrolluar tri objektet e banimit të personave të dyshuar (dy në Gjakovë dhe një në Pejë) ku janë siguruar prova materiale që ndërlidhen me rastin.
Gjatë kontrollit janë sekuestruara dëshmitë si në vijim:
– para të gatshme 11600 Euro,
– katër (4) telefona mobil
– një ( 1 ) IPOD
– një (1) pasaportë e Republikës se Shqipërisë
– një (1) letërnjoftim i Republikës se Shqipërisë
Tre të dyshuarit janë intervistuar në prezencë të avokatit mbrojtës dhe pas intervistës me aktvendim të prokurorit janë ndaluar për 48 orë”, thuhet në njoftimin e Policisë së Kosovës.
