Këshilli për Mbrojtjen e Lirive dhe të Drejtave të Njeriut (KMDLNj) ka shprehur kundërshtimin e tij ndaj arrestimit të 12 aktivistëve që protestuan para zyrave të Zyrës së Rregullatorit për Energji (ZRrE), duke kundërshtuar rritjen e çmimit të energjisë elektrike.
Sipas KMDLNj, kjo rritje, e cila ka arritur një total prej 146% gjatë qeverisjes së Kurtit 2, është e papranueshme dhe e papërballueshme për shumicën e qytetarëve të Kosovës.
KMDLNj ka rikujtuar opinionin publik se ZRrE ka ushtruar padrejtësi ndaj qytetarëve për një periudhë 15-vjeçare, duke fryrë faturat për të kompensuar shpenzimin e energjisë nga komuniteti serb, veprim që është konstatuar edhe nga gjykatat kompetente, por nuk është zbatuar nga institucionet. Po ashtu, KMDLNj e ka akuzuar ZRrE-në për diskriminim etnik, duke theksuar se qeveritë e kaluara nuk kanë marrë asnjë masë për të mbrojtur qytetarët.
Organizata ka paralajmëruar se rritja e re e çmimeve të energjisë elektrike do të shkaktojë efekte zinxhirore, duke ndikuar në rritjen e çmimeve të të gjitha produkteve dhe shërbimeve. KMDLNj ka ftuar qytetarët e Kosovës të marrin pjesë masivisht në protestën e paralajmëruar më 5 prill 2025, për të kundërshtuar këtë rritje dhe për të kërkuar llogari nga institucionet për vjedhjen që ua ka bërë ZRrE për 15 vite.
KMDLNj gjithashtu ka dënuar ashpër arrestimin e protestuesve, duke kërkuar lirimin e tyre të menjëhershëm dhe marrjen e masave ligjore ndaj përfaqësuesve të ZRrE-së dhe Ministrisë përkatëse që kanë lejuar një politikë të tillë diskriminuese. Organizata u bëri thirrje institucioneve të mos instrumentalizojnë Policinë e Kosovës dhe të respektojnë të drejtën themelore të qytetarëve për protestë paqësore
