Gazetari dhe analisti i njohur, Vehbi Kajtazi po thotë se vendimi i Qeverisë së Kosovës për rritjen e pensioneve për 20 për qind, është bërë me qëllim të shpërqëndrimit të qytetarëve nga ndryshimi i masave të vendosura ndaj mallrave serbe.
Madje, Kajtazi e krahason Kryeministrin Kurti edhe me Nastradinin.
“Diten qe lejon hyrjen e mallrave serbe ne Kosove, i rrit pensionet 20 per qind. I fort je shoku Albin. Demek, tash folni per pensione e jo per mallrat serbe. I forte je shoku Albin. Ia kalon edhe Nasradin Hoxhes”, ka shkruar Kajtazi.
Ndryshe, kujtojmë se sot Qeveria e Kosovës përveç ndryshimit të masave ndaj mallrave serbe, ka marrë vendim edhe për rritjen e pensioneve.
“Masat tona nuk kanë qenë dhe asnjëherë nuk janë masa tregtare, janë masa të sigurisë. Në dy vitet e fundit Serbia i ka sjellë katër herë ushtrinë e saj tek kufiri i Kosovës, në vitin e kaluar dhe këtë vit kemi pasur katër konfiskime të mëdha të armatimit dhe municionit, ndërkohë që grupi paramilitar terrorist që e vrau rreshterin e policisë, Afrim Bunjaku, vazhdon të jetë i lirë në Serbi. Nëpërmjet rrugëve të ndryshme mund të kenë qenë, jo vetëm ilegale nëse kanë hyrë mallra të gatshme nga Serbia e ne nuk i kemi hapur ato, nuk mund të përjashtojmë që diçka përvidhet, kjo i ndodhë edhe ShBA-së edhe Gjermanisë”.
“Prandaj ne duhet të ndërmarrim masa të sigurisë dhe asnjëherë, masa tregtare në njërën prej pikave kufitare ne po e bëjmë këtë ndryshim të masës sipas letrës që ia ka dërguar ministri Sveçla drejtorit të Doganave, ai është marrë me këtë punë, por me këtë punë është marrë e gjithë Qeveria jonë, prej meje e sidomos zëvendëskryeministri Besnik Bislimi, e deri tek këshilltarit e mi, këta kanë biseduar edhe me BE edhe me Gjermaninë. Ndryshimi i masës që e bëjmë është mëse i mjaftueshëm që pasnesër në CEFTA dhe të hënën në Proces të Berlinit të kemi sukses të plotë”.
