Avokati kosovar, Faton Fetahu, në cilësinë e mbrojtësit të ish-kryetarit të Kuvendit të Kosovës, Kadri Veseli, ka njoftuar se e ka paditur për shpifje deputetin e VV-së, Visar Korenicen.
Sipas Fetahut, nuk janë të vërteta deklaratat e Korenices dhënë për portalin “Indeksonline” në artikullin e publikuar me titull: “ATK-ja ‘akshom Pazar’ me pozita, avancohen punëtorët që dëmtuan buxhetin”.
“Si përfaqësues ligjor i ish Kryetarit të Kuvendit të Kosovës, z. Kadri Veseli, kam dorëzuar këto ditë padi për shpifje kundër deputetit të Lëvizjes Vetëvendosje, Visar Korenica. I njëjti, në muajin mars të këtij viti, konsumoi një shpifje të pashembullt ndaj z. Veseli, në përpjekjen e tij të dëshpëruar për të vlerësuar rrethanat e dështimit të një projekti në kuadër të Administratës Tatimore të Kosovës. Deputeti Korenica këtë deklaratë e kishte dhënë për portalin “Indeksonline” dhe artikulli ishte publikuar me titull: “ATK-ja ‘akshom Pazar’ me pozita, avancohen punëtorët që dëmtuan buxhetin”, ka shkruar në Facebook ai.
