Vetëm 20 minuta iu deshën Janez Jansas, kryeministërit të Sllovenisë, për të dërguar një mesazh të qartë që shënon një kthesë të plotë në qëndrimin e vendit të tij ndaj Izraelit. Menjëherë pas votëbesimit parlamentar për qeverinë e tij, punonjësit e mirëmbajtjes në Slloveni hoqën flamurin e PLO-së (Organizata për Çlirimin e Palestinës), i cili kishte valuar mbi ndërtesën qeveritare për dy vitet e fundit.
Sllovenia nën Janšën – siç ai premtoi në një intervistë ekskluzive për revistën e Israel Hayom – do të transformojë plotësisht marrëdhëniet me Izraelin, duke kaluar nga armiqësi e hapur në miqësi të fortë në dobi të të dy vendeve.
“E çmendur”, tha Janša, 67 vjeç, duke përshkruar paraardhësit e tij në detyrë, të cilët, sipas tij, i kishin çuar marrëdhëniet me Izraelin në nivelin më të ulët historik. Ai shpjegoi se si planifikon t’i riparojë lidhjet mes Lubjanës dhe Jerusalemit – po, Jerusalemit – pasi një nga planet e tij më të rëndësishme është zhvendosja e ambasadës sllovene nga Tel Avivi në kryeqytetin e Izraelit, raporton IsraelHayom.
“Izraeli është partner strategjik sepse kontribuon në stabilitetin rajonal dhe në luftën kundër terrorizmit”, tha Janša. “Është partner demokratik sepse ndan me Evropën vlera themelore të lirisë dhe shtetit të së drejtës. Për më tepër, Izraeli është model në shumë fusha, përfshirë inovacionin teknologjik, sipërmarrjen, kërkimin shkencor, menaxhimin e krizave dhe sigurinë kombëtare. Një vend i vogël me burime të kufizuara ka arritur të bëhet lider global në inovacion. Kjo është një arritje mbresëlënëse nga e cila mund të mësojë çdo vend evropian.”
Të dy vendet, vijoi ai, “përballen me shumë sfida të njëjta – terrorizëm, ekstremizëm, erozion të identitetit kombëtar dhe presione gjeopolitike në rritje. Në vend që të largohen nga njëri-tjetri, duhet të rrisin bashkëpunimin. Izraeli nuk është problem i Evropës; ai është një nga aleatët e saj më të rëndësishëm.”
Janša pritet ta shprehë këtë qëndrim në Bruksel, ku synon të forcojë bllokun pro-Izrael dhe të kundërshtojë çdo përpjekje për vendosjen e sanksioneve ndaj Izraelit dhe izraelitëve. Sipas tij, mjeti i sanksioneve është krijuar për të luftuar armiqtë e Perëndimit, jo një aleat si Izraeli.
Si vizitor i shpeshtë i Izraelit, Janša nuk beson në “gënjeshtrat” e përhapura kundër vendit. Ai ka vizituar Izraelin edhe menjëherë pas masakrës së 7 tetorit për të shprehur solidaritet dhe mbështetje të pakushtëzuar. Tani, sipas tij, këto qëndrime do t’i kthejë jo vetëm në fjalë, por edhe në veprime.
“Qeveria e majtë që ka qeverisur Slloveninë në vitet e fundit e ka njohur shtetin palestinez në kundërshtim me ligjin slloven”, tha Janša. “Ne do ta respektojmë ligjin dhe do ta pezullojmë këtë vendim të paligjshëm. Këtë e kemi vendosur si kusht në negociatat e koalicionit dhe të gjithë janë pajtuar.”
Megjithatë, para se të merret me skenën më të gjerë evropiane, ai synon të transformojë marrëdhëniet nga themeli dhe të ftojë izraelitët të vizitojnë, të udhëtojnë dhe të investojnë në Slloveni. Sipas tij, një qëndrim i qartë armiqësor ka ekzistuar gjatë qeverisë së Robert Golobit, i cili madje deri në fund të mandatit të tij kishte bllokuar uljen e një avioni të kompanisë izraelite Israir në Slloveni. Tani, sipas tij, marrëdhëniet Jerusalem–Lubjanë mund të hyjnë në një “epokë të artë”.
