Ish-inspektori i Agjencisë së Kosovës për Inteligjencë (AKI), Shkelzen Sopjani, ka paralajmëruar gjuajtje të sërishme në drejtim të policisë së Kosovës në Veri të Mitrovicës.
Sopjani në emisionin “Personale” të RTV Dukagjini, ka thënë se situata nuk duket se është e përgatitur për konflikte të mëtejshme, por ka brishtësi të caktuara të sigurisë, veçanërisht për shkak të Serbisë.
“Situata e sigurisë nuk është shqetësuese, por nuk është edhe jo e brishtë pasi që ka brishtësi dhe e gjithë kjo për shkak të fqinjit verior që e kemi Serbisë, pasi që interesi primar i tyre është që Kosova me qenë sa më e pasigurtë dhe me stagnu sa më shumë. E di sigurt që ata nuk kanë arritur në misionin e tyre, kanë dështuar dhe dështimi më i madh është parë edhe ditëve të fundit”, ka thënë Sopjani.
Sopjani ka shtuar se ka pasur paralajmërime për një sulm të mundshëm në veri të Kosovës.
“Paralajmërimi për një sulm të mundshëm në veri është bërë mbi bazën e përvojës dhe ekspertizës duke bërë krahasime dhe duke e njoftë se çfarë janë në gjendje për të bërë ata, kështu që për mua ka qenë e pritur edhe institucionet e sigurisë nuk kanë qenë të befasuar sepse edhe ato e kanë ditur pak a shumë se do të ndodhë diçka e tillë”, vijon ai.
Ai ka paralajmëruar se autoritetet e sigurisë duhet të jenë të përgatitura për ndonjë veprim sporadik nga ana e serbëve.
“E gjitha ndodhi dhe dolëm jashtëzakonisht ballëhapur dhe kryelartë në atë se çka pamë dhe nuk e përjashtojë që mund të ketë edhe pse probabiliteti është shumë më i vogël për me pasë diçka të tillë, mirëpo ndonjë veprim sporadik nuk përjashtohet edhe sot. Mund të ketë ndonjë gjuajte ndaj pjestarëve të policisë, sepse ata [serbët] kanë dal të lënduar dhe të zhgënjyer prej kësaj situate dhe do të mundohen që para publikut të tyre të na poshtrojnë”.
Sopjani ka theksuar se pjestarët e policisë në Kosovë duhet të jenë të vigjilentë ndaj ndonjë rreziku të mundshëm, pasi që serbët janë të zhgënjyer dhe të poshtëruar dhe mund të eskalojnë me ndonjë gjuajtje ndaj pjestarëve të policisë.
Përkundër sfidave, Sopjani ka vlerësuar se situata e sigurisë nuk është e brishtë deri në masën që të dalë prej kontrollit dhe shtimi i numrit të pjestarëve të KFOR-it është një tjetër faktor që ka për qëllim të përmirësojë sigurinë në rajon.
“Serbia është dhe ka mbet në një iluzion, i cili iluzion ushqehet prej fanatizmave dhe prej nacionalizmave të sëmurë pasi që ata nuk shohin kurgjo përtej Serbisë dhe serbëve në këtë pjesë, por e kanë të qartë një pjesë e madhe e tyre të cilat janë duke u vetëdijësuar dhe duke e parë që nuk është mirë të jetohet në këtë iluzion pasi që nuk është lehtë edhe për ta për me qenë satelit i Rusisë, sepse rrethanat gjeopolitike po ndryshojnë”, ka përfunduar Sopjani.
