Zlatan Ibrahimovic dëshiron ta vazhdojë kontratën me Milanin.
Sulmuesi suedez pritet të mbetet pjesë e “Rossoneri” edhe në sezonin tjetër, ndërsa do ta marrë një rrogë simbolike dhe pjesa më e madhe e saj do të lidhet me rezultatet personale dhe të skuadrës.
Lajmin e ka bërë të ditur mediumi italian “La Gazzetta dello Sport”.
Takimi me drejtorin teknik, Paolo Maldini dhe drejtorin sportiv Frederic Massara pritet të ndodhë javën e ardhshme kur sulmuesi veteran do të rikthehet në Milano për ta nisur rehabilitimin.
Aktualisht, 40 vjeçari gjendet në Suedi për t’u relaksuar me familjen pas intervenimit kirurgjik në gju, i cili do ta lë jashtë fushës së blertë deri në janar 2023.
Dhe, sapo të rikthehet në qytetin e modës, do ta bëjë një takim me drejtuesit e Milanit për të folur rreth së ardhmes.
Ibra do t’i mbushë 41 vjet në fillim të tetorit, por ky fakt nuk po e pengon atë.
Legjenda suedeze dëshiron të vazhdojë, së paku edhe një vit tjetër.
