Deputeti i LDK-së, Avdullah Hoti, ka thënë se Qeveria Kurti është e korruptuar deri në palcë.
Hoti tha se qeveria aktuale ka disa raste të hapura për afera korruptive të mëdha, ku përmendi rastin në KEK, rezervat shtetërore dhe atë për amabalzhuesit e ujit.
“Kjo qeveri është e korruptuar deri në palcë. Ka disa raste të hapura për afera korruptive bukur të mëdha, në KEK për shembull, apo me rezervat shtetërore ose në ministrinë e Infrastrukturës. Janë afera që po ftohet për të dëshmuar edhe kryeministri”.
“Si mund të bëjë ftesë kryeministri për ta forcuar rendin dhe ligjin, cfarë mesazhi është ky para një qytetari që i ik ligjit, kur vet kryeministri i vendit, nuk i përgjigjet ftesës së Prokurorisë”, tha Hoti në “DPT te Fidani” në Klan Kosova.
Tutje, ai tha se Kurti ka ardhur deri në pikën sa që “nëse të thotë ky që është ditë, duhet të dalësh në dritare e ta shohësh a është vërtetë ditë a jo”.
“Ky ka ardhur deri në pikën që nëse ky të thotë që është ditë, duhet të dalësh në dritare ta shohësh vërtetë se a është ditë a jo. S’mund t’i besoj askush më, ka shkuar deri në atë masë mashtrimi politik sa që nuk ka njeriu si të bazohet në fjalët e tij”, tha ai.
