Sekretari i Mbrojtjes i SHBA-së, Pete Hegseth ka shkarkuar planifikuesin më të lartë ushtarak të Pentagonit të mërkurën.
Ky shkarkim është i fundit në serinë e shkarkimeve të gjeneralëve dhe vjen ndërsa presidenti amerikan Donald Trump po shqyrton mundësinë e rinisjes së sulmeve ndaj Iranit, teksa lufta ka hyrë në muajin e tetë.
Gjenerali Lejtnant i Ushtrisë Brett Sylvia është gjenerali i dytë që shkarkohet nga posti, i njohur në qarqet ushtarake si “J5”, nën drejtimin e Hegseth. Paraardhësi i tij, gjenerali Lejtnant Joseph McGee, u detyrua të tërhiqej tetorin e kaluar.
Deri tani nuk dihet zëvendësimi i tij dhe nuk është dhënë ndonjë arsye zyrtare për shkarkimin e tij.
Zakonisht, drejtori i J5 dhe stafi i tyre janë përgjegjës për gjenerimin dhe koordinimin e planeve ushtarake si me kryetarin e Shtabit të Përgjithshëm të Ushtrisë Amerikane ashtu edhe me presidentin.
Shkarkimi i Sylvias vjen ndërsa Trump ka folur vazhdimisht për fillimin e operacioneve të reja ushtarake kundër Iranit.
Trump është zotuar të “përfundojë punën” në Iran pasi nisi luftën me Izraelin tetë muaj më parë dhe tha se sulmet e reja janë një mundësi pas zgjedhjeve të mesit të mandatit javën e ardhshme.
Zyrtarët amerikanë u kanë thënë disa vendeve të Lindjes së Mesme dhe aleatëve rajonalë të jenë të përgatitur për veprime të mundshme të ripërtërira ushtarake pas zgjedhjeve të së martës, si dhe për mundësinë që Irani të përpiqet të hakmerret kundër tyre, thanë dy diplomatë të informuar për këtë çështje. Ata thonë se Trump nuk ka marrë një vendim përfundimtar për sulme të reja.
Ndërkohë, një aeroplanmbajtëse e tretë amerikane dhe mijëra trupa shtesë po shkojnë drejt rajonit./
