Ministrja e Drejtësisë, Albulena Haxhiu, ka deklaruar se me urgjencë kanë adresuar gjetjet e Gjykatës Kushtetuese për Ligjin për Byronë për Verifikimin dhe Konfiskimin e Pasurisë së Pajustifikueshme.
Ajo u ka bërë thirrje partive politike që ta mbështesin ligjin e ndryshuar.
“Ne nuk kemi draftuar një ligj të ri. Nuk kemi pasur nevojë të draftojmë një version të ri të ligjit, por kemi adresuar vetëm katër çështje”, ka deklaruar ajo në një konferencë për medie.
Sipas saj, versioni me ndryshimet ka rikonstruktuar komisionin mbikëqyrës.
“Sapo të kemi deklaratat e Ministrisë së Financave dhe Qeverisë së Kosovës, ne do ta procedojmë sërish versionin me ndryshime. Sipas njoftimeve që kam nga kabineti, brenda javës do të kemi këto dy deklarata dhe menjëherë do ta procedojmë në Qeveri e më pas në Kuvend”, ka theksuar ajo.
Ndryshe, më 26 qershor, Gjykata Kushtetuese e Kosovës e ka shpallur të pavlefshëm Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
Në vendim, Kushtetuesja i ka vlerësuar në kundërshtim me Kushtetutën katër nene të këtij ligji, por tha se duke pasur parasysh rëndësinë e këtyre neneve dhe pa ndryshimin dhe plotësimin e tyre nga Kuvendi i Kosovës, Ligji për Byronë Shtetërore “është shpallur i pavlefshëm në tërësinë e tij”.
Lënda në Kushtetuese u dërgua nga deputetët e Partisë Demokratike të Kosovës (PDK).
Vendimi i Kushtetueses ishte kritikuar nga ministrja e Drejtësisë, Albulena Haxhiu, e cila kishte thënë se kjo lëndë u dërgua në gjykatë, për të “sabotuar” reformën në drejtësi.
